كارثة حقيقية تهدد مستقبل أبطالنا.. هيثم أمان يفتح ملف الطب الرياضي ويستشهد بواقعة إصابة عمر عصر

أثار المهندس هيثم أمان الأمين العام المساعد لحزب المؤتمر بالقاهرة، ملف الطب الرياضي ومدى الاهتمام به وتطبيقه في مصر، وقال في منشور له عبر صفحته الرسمية على فيسبوك، أن الملف من القضايا التي تستحق مناقشة جادة ومسؤولة، مشددا على ضرورة التحرك الفعلي لتطبيق القوانين المنظمة لهذا المجال الحيوي حفاظًا على صحة الرياضيين المصريين الذين يمثلون ثروة وطنية حقيقية.

وقال المهندس هيثم أمان على صفحته الرسمية على موقع "فيس بوك" :" تفتكروا كام رياضي في مصر عنده ملف طبي فعلاً؟ .. الحقيقة إني حاولت أبحث عن إجابة للسؤال ده، ومقدرتش أوصل لرقم محدد، لكن وأنا ببحث اكتشفت إن المادة رقم 79 من قانون الرياضة الصادر سنة 2017 بتلزم كل الأندية والهيئات الرياضية بإعداد سجل طبي لكل رياضي، يتضمن تاريخه الصحي، ويتحدث بشكل دوري".

وتابع أمان :" ورغم إن القانون ده صادر بقاله أكتر من 8 سنين، واتعدل كمان من حوالي سنتين، لكن أقدر أجزم إن فكرة وجود ملفات طبية شاملة للرياضيين في مصر لسه مش جزء من الواقع الرياضي عندنا".

وأكمل :" مش هنروح بعيد... إحنا لسه من أيام قليلة كان عندنا أزمة في منتخب مصر لتنس الطاولة أثناء مشاركته في أهم بطولة قارية، لما اللاعب الكبير عمر عصر – واحد من أفضل المصنفين عالمياً – اتصاب فجأة أثناء البطولة، وللأسف البعثة مكانش معاها طبيب! .. والموضوع اتحل وقتها بالمحايلات والمجاملات، وإن اللاعب يتحامل على نفسه ويلعب".

وأضاف:" إحنا صحيح حققنا ميداليات مهمة في البطولة دي، بس لازم نعترف إن عندنا كارثة حقيقية اسمها الطب الرياضي في مصر".

واختتم:" الموضوع ده في غاية الأهمية، ولازم نناقشه من كل الجوانب علشان يكون في تنفيذ حقيقي على الأرض، لأن ولادنا الرياضيين دول ثروة حقيقية، ولازم نحافظ عليهم".