تامر حسين يكشف كواليس ”يا بلدنا يا حلوة”: قدمنا جمال مصر وناسها
أعرب الشاعر الغنائى تامر حسين، عن سعادته بردود الأفعال الجيدة عن أغنية الهضبة عمرو دياب الجديدة "يا بلدنا يا حلوة".
وكتب تامر حسين عبر حسابه على موقع التواصل الاجتماعي" فيسبوك": "الحمد لله على ردود أفعال الناس الحلوة في كل مكان فى بلدنا الجميلة، بناسها الطيبة البسيطة، من شرقها لغربها لشمالها لجنوبها، كنت أتمنى أقول مكان مكان وكل شبر فى البلد والله عشان العالم كله يشوف جمال مصر وناسها".
وأضاف حسين: "حاولت على قد ما قدر تجميع أبرز الأماكن أو المحافظات المترابطة القريبة لبعض اللى تُمثل قطاع أكبر من الناس سواء فى وجه قبلى أو بحرى، كلهم أماكن عظيمة نتشرف بيهم، بس دى أغنيتنا كلنا، ودعاية محترمة لبلدنا العظيمة بعد الكورونا وكل الظروف اللى بتمر بيها بلدنا الغالية".
وتابع تامر حسين: "كل فنان قام بدوره على أكمل وجه عشان يقدم مصر وناسها الطيبين فى أجمل صورة، مصر اللى مفيهاش عنصرية، فيها البيض زى السُمر، والمسلم أخو المسيحى، وكل المشاهد الإنسانية والروحانية اللى بنشوفها فى بلدنا مع الناس الأصيلة من كل فئات المجتمع المصرى، وحاولنا نجسد الروح الحلوة اللى فى شوارعنا وأحياءنا وبيوتنا والأماكن المصرية الأصيلة وعاداتها وجمالها".
واختتم تامر حسين: "كان عندى أمنية إن الفنان عمرو دياب يغنى جملة للعيد تعيش طول العمر لأجيال وأجيال، ودايما فى بلدنا العيد عيدين، ودايما مصر حلوة بناسها وأهلها الطيبين، كل سنة وأنتم طيبين وبخير وعيد سعيد عليكم وعلى حبايبكم، وكل سنة ومصر حلوة بيكم ونخليها فى أجمل صورة بشبابها وأولادها المُخلصين والمتميزين فى كل المجالات".
وطرح الهضبة عمرو دياب أغنيته الجديدة "يا بلدنا يا حلوة" مساء أمس الأربعاء، من كلمات تامر حسين، وأخرج الكليب طارق العريان.
