الحوادث

”الأولى على الثانوية العامة”.. جارة ضحية واقعة ”سحل فتاة النزهة”: كانت بتحضر لحفلة تخرجها

الإثنين، 28 ديسمبر 2020 11:17 مـ بتوقيت القاهرة

نشرت إحدى جيران ندى شديد الفتاة التي لقيت مصرعها دهساً في حادث تصادم حال عبورها الطريق بمنطقة النزهة، والمعروفة إعلاميا بـ"سحل فتاة النزهة"، منشوراً عبر موقع التواصل الإجتماعي الفيسبوك، تحكي خلاله عما حدث.

وقالت خلال منشورها ندي بنت عم شهد شديد الأولى على الثانوية العامة اللي القناطر كلها افتخرت بيها.. تخيل واحدة كانت بتحضر لحفلة تخرجها وكل كلامها عن أنها خلاص في آخر سنة ليها في الكلية وهتتخرج.. ندي واحدة كانت بترسم وتتخيل مستقبلها بعد التخرج.. يا تري هتشتغل ،، هتتجوز ،، حاجات كتير أوي زي اي بنت في سنها.. كل دا يروح في لحظة علشان الاستهتار واللامبالاه.

وأضافت خلال منشورها، يتصلوا بوالدتها يقولولها بنتك مكسورة وهي يا عيني مش في دماغها تقوم توضب أوضتها وسريرها علشان بنتها لما تيجي ترتاح عليه.. وبعد كده يصدموها إن بنتها ماتت.. زي أي أم مش عايزة تصدق ولسه مستنية حد يقولها بنتك عايشة ماتحزنيش يا ست الكل .

وواصلت خلال منشورها، اللي زي نورهان بالسرعة اللي كانت ماشية بيها بشهادة ناس كانت في الواقعة وإنها ماشية تخبط في خلق الله وتقولولي خوف وسوء تصرف.. كل دي مبررات لا تمنعها من العقاب او المحاكمة القانونية.. خبطتها تقف دا اللي نعرفه في قانون الانسانية.. لكن ندي فستانها يبقي شابك في العربية وتسحلها 2 كيلو لحد ماتقع جثه هامدة.. وتروح بيتها ولا كأنها عملت حاجة وأهلها مرة يقولوا مامتها كانت سايقة العربية ودلوقتي عاملين محضر إن العربية كانت مسروقة ولكن الكاميرات جايباكي يا نورهان وإن شاء الله هتتعاقبي على جريمتك".

وأشارت خلال منشورها على الفيسبوك،" موقف لا يتمني أي إنسان أن يراه.. يا وجع القلب.. إحنا مؤمنين وعارفين أنه قدر وأنها أسباب.. لكن الإهمال والاستهتار لما يوصل أنه يودي بحياة إنسان ساعتها لازمنا وقفه.. إحنا مش عايزين غير إنها تتحاكم بالقانون.. وتكون عبرة لمن لا يعتبر وطول ما اللي زي نورهان بيتعاقب على اخطاءه.. الناس كلها هتحترم قوانين المرور وهتقل الحوادث.