”عايز يولع روما”.. شوبير يواصل هجومه على أحمد مجاهد رئيس اتحاد الكرة
واصل أحمد شوبير نائب رئيس اتحاد الكرة السابق، هجومه العنيف على أحمد مجاهد رئيس اللجنة الثلاثية المكلفة بإدارة الاتحاد المصري لكرة القدم.
وقال شوبير في تصريحات عبر برنامجه الإذاعي على "راديو أون سبورت": "كل خطط الاتحاد الأحادي باظت بعد اجتماع الأندية، الاتحاد عامل زي عنتر في الاسكتش الشهير أوعى يجيلك عنتر، عايز يولع روما بحالها".
وتابع: "شوية يقول هنلغي الفار ولما الأندية اعترضت قال خلاص هو إنتم زعلتم مش هنلغيه، هنعمل رابطة للأندية ورجع قال لأ خلاص مفيش رابطة وده مش تراجع محدش يقول علينا بنتراجع".
من يدير الاتحاد؟
ورد شوبير على تصريحات أحمد مجاهد، حيث قال: "بيقول إني داخل معاك معركة شخصية، وأنا بقوله معنديش معركة شخصية معاك ولا مع غيرك ولا مع كبيرك، لإنك لا تستحق معركة شخصية من الأساس، أنا هفضل أسأل من يدير الكرة في مصر، طول عمرنا عارفين إن الكرة تدار من خلال لجان المسابقات والحكام وكل ده مشيته أول ما اتعينت، لازم نعرف من يدير الجبلاية، بقولها بحرقة مينفعش اتحاد كرة يديره فرد واحد".
وشدد شوبير: "لو متخانق مع عمرو الجنايني اضربوا بعض في الشارع لكن بعيدًا عن الاتحاد، مش كل قرار خده الجنايني تمسحه باستيكه، أنا أول من انتقد اللجنة الخماسية في بداية عملها، لكن تغير موقفي بعد ما شوفت انجازاتهم لكن مينفعش اتحاد الكرة يخدم على بني ادم واحد عشان يبقى الرئيس".
اقرأ أيضًا: أحمد مجاهد يوجه رسالة لـ اللجنة الخماسية السابقة: ”لا أتصيد أخطاءهم”
واختتم شوبير تصريحاته: "هناك كوارث وبلاوي في الاتحاد وهفضل ازعق واصرخ في الراديو والتليفزيون، كفاية إني اقول أن في 8 مليون جنيه مستحقات للاتحاد لدى الكاف وانت بتقول مفيش فلوس ندفع لشركة الفار".
