قصيدة| تعبت!
تعبت
من كتر ما بقول لنفسي تعبت!
من كتر ما أنا واخدة الحنين في إيديا منين ما أروح
من كتر مابعيط ع اللي جاي
واللي م الممكن يروح
"كيف السبيل إلى السعادة دلني"
تايهة
عمَّالة بغرق في الهموم
وأعوم
تنقذني مركب من غير شراع
نغرق
تنقذني رحمة ربنا رغم اعتراضي!
أطلع وأنا
هدومي ناشفة
وبالي نادي
وريقى ناشف
وقلبي
قلبي مكشوف للجميع
يبرد ساعات
آخده ونجري نستخبى في حضن بعض
ندوب
نبرد
ننده على الناس في الشوارع
ولا حد يسمع حسِّنا
نجوع
نخبط على بِبان الحبايب
نِلقى كل الناس في كَرب
الكل مهموم في الحياة
والناس في حرب!
بعرّي قلبي اللي انطفى للشمس
تنشف دموعه ويتصلب عوده
قلبي الجميل
معروف تملي من ردوده
هادي وأخضر
وطبعُه حلو
وحظه بس اللي قليل
بيبان عليل
مع كل أزمة بيتكسر مايموتش!
مع كل أزمة بيتكسر ويعيش
بتدب فيه الروح من حيثُ لا يدري
الدنيا ربطاني طول الوقت
بالحبل من رجلي
بحاول
وكل أما أحاول في الهروب
بَتشد من ضلعي
خيوط
الدنيا مليانة بخيوط
وأنا أخطبوط
والدنيا ماسكاني بسنانها وكل مادا تجزّ!
تحبوا أوريكم في جسمي العضعضة؟!
دي مش ندوب على فكرة دي آثار محنتي
ودي مش محاولة انتقام.. لاءه
ولا شرح للمعاناة
الجرح كل ما يتحكي عنه
مابيبقالوش معنى..
الصبح فتحت عيني على الهزيمة بشكلها المُعتاد
جهزِّت نفسي وقلبي للبكا من سُكات
ولبست فُستان الدموع المشمشي
يمكن دموعي المرة دي وهي نازلة تختشي
حطيت هزيمتي في جيبي ومشينا
هزيمتي في جيوبي وقلبي جميل
عمالة أغني برقِّة العصافير
يا رقِّة القدر
يا رقِّة ربنا وعفوة ع الناس الغلابة!
قادر يشيلنا من بين نياب كل الديابة
كل السحاب دلوقتي ماشي بيبتسم إلا سحابة
مهزومة
بتجُر قلة بختها وبتقول يا رب
محتاجة منك طبطبة أو حضن أب
فماتختبرش الصبر فيا أكتر من كدا
رسيني ع البر اللي منه أكون أنا
أو خدني ليك أرحم لي إني أعيش هِنا..
