هجوم على زاهي حواس بعد تصريحاته عن مسلسل ”الملك” وتجسيد رمضان للشخصية

تعرض وزير الآثار الأسبق زاهي حواس لانتقادات وهجوم من مجموعة مشاهير بالفن بسبب رأيه في مسلسل "الملك" وتصريحه الأخير عنه.

ومن جانبها أعربت الفنانة مها نصار عن استيائها الكبير من إيقاف تصوير مسلسل "الملك" الذي تشارك به ضمن السباق الرمضاني المقبل لعام 2021، واحتمالية عدم خوضه ضمن الموسم عبر صفحتها الرسمية بموقع التواصل الاجتماعي "فيسبوك".

وكتبت مها نصار: "كلام الناس فوق رأسي من فوق سواء بالسلب أو بالإيجاب حقك تقول اللي أنت عايزة بس علشان احترم كلامك لازم تكون بتتكلم صح وعن وعي ودا مبيتحققش غير بعد المشاهدة الجيدة للعمل.. أنا حابة أوضح حاجة صغيرة احنا بنعمل عمل درامي مستوحى من التاريخ وليس فيلم وثائقي عن الملك أحمس وإلا كنا هنعمل اللي في التاريخ بالظبط إن الملك أحمس اتجوز أخته لأن في العصر ده كان جواز الأخوات عادي".

وتابعت: "لكن احنا بنعمل رواية اسمها كفاح طيبة للأديب العالمي نجيب محفوظ اللي قرأ الرواية هيفهم كلامي كويس.. الأديب كان ليه رؤية مختلفة من خياله ودكتور زاهي حواس في كلام سابق لما قرأ الرواية قال إنها مستوحاه من التاريخ وليست التاريخ".

وأضافت أيضًا: "فأنا مستغربة جدًا لكلام دكتور زاهي حواس دلوقتي!!! .. ما دام المخرج بيعمل رواية من خيال الكاتب ومستوحاة من التاريخ ودا طبعًا مكتوب على المسلسل فمن حقه يبدع ليه نحصر الفن في دايرة ضيقة ونلف فيها!!! كلنا التزمنا بالرواية ودا بيحصل في العالم كله ومش جديد أنه يضيف شخصية جديدة يغير شكل الممثلين يموت شخصية يطلعنا بنطير هو حر".

وقالت أيضًا: "ولو كنا صبرنا كنا هنلاقي الكلام دا علي التتر.. الفن للمتعة والحكم دايمًا بيبقي فيه للجمهور اللي احنا بتشتغل علشانه.. واحنا جمهورنا واعي كفاية إنه يغير القناة لو حاجة معجبتهوش"، مختتمة حديثها: "أنا بتحدي أي حد إنه بعد عرض الحلقة الأولى بس.. هيحصله انبهار وتشوق ومتعة وهيكمل المسلسل للآخر وهيحترم المجهود الضخم الواضح من كل صناع العمل".

وأخيرًا قالت: "علشان تبقى ناقد واحترم كلامك وأفهمه لازم تكون بتكتب كلام محترم وهادف أفهم منه فين أخطائي وأصلحها وتضيفلي شيء جديد ودا مبيحصلش غير بعد مشاهدة العمل و في الحالة دي بس لازم اسمعلك لأنك هتضفلي شيء..أنا فخوره جدا إني اشتغلت في مسلسل الملك".

اقرأ أيضًا: بعد انتقاد وقف المسلسل.. ياسين السقا يفاجئ الجمهور برد فعله

وفي السياق نفسه، هاجم السيناريست صلاح الجهيني، الدكتور زاهي حواس، بعدما رشح محمد رمضان، لتقديم شخصية "أحمس" بدلاً من الفنان عمرو يوسف، وكتب عبر صفحته: "غريبة أوي أن بعد كل اللي حصل ده، ييجي حد بعلم وخبرة دكتور زاهي حواس ويرشح ممثل أكبر من عمر شخصية أحمس الدرامية بفرق كبير كده أمال فين الأمانة التاريخية يا دكتور؟".

ويشار إلى أن علا شقيقة الفنان عمرو يوسف علقت على الأمر وتصريحات زاهي حواس ومحمد رمضان قائلة: "وضحت الرؤيا ولا لسه أتمنى كل اللي مسك في الكام كلمة نقد اللي اتقالوا بعد وقبل عرض البرومو واقتنع أو ساهم في نشر الكلام السلبي بتسرع قبل ما يدي فرصة المشاهدة الموضوعية والنقد البناء إنه يراجع نفسه، ويشوف ما وراء الستار.. توقيت فاضح نفسه بنفسه".