حلا شيحا تهاجم والدها: ”أنا مش مخطوفة وجوزي مش بتاع ستات”
دافعت الفنانة حلا شيحة، زوجها الداعية والمنتج معز مسعود، ضد تصريحات والدها الفنان التشكيلي أحمد شيحة، التي هاجم فيها زوج ابنته واتهمه بخطفها.
وفي منشور لـ حلا شيحة عبر حسابها الشخصي على موقع تبادل الصور والفيديوهات الشهير "إنستجرام"، حيث نشرت صورة لزوجها معز مسعود وعلقت عليها كاتبة: "الحقيقة مصدومة من الكلام اللي والدي قاله عن زوجي اللي اتجوزته بكامل ارادتي و الحمد لله لقيت معاه كل المعاني الجميلة من احترام ورجولة وشهامة نادرة الايام دي، وانا لم يخطفني احد كما قال والدي و الكلام ده لا يصح ابداً".
اقرأ أيضا: بالحجاب.. حلا شيحة توجه رسالة جديدة: ”هنيئا بشطب عضويتي من النقابة”
وتابعت: "انا بحب زوجي و سعيدة بحبه ليا و بنحترم بعض و معز بيحترم رايي و بيقدر مشاعري و بالعكس هو دائما بيهدّيني . و طبعا بيساندني ويشجعني لاني زوجته و حبيبته..وهو اكبر بكتير من كل الكلام اللي بيتقال عليه و افتراءات مش صحيحة و هو ابعد ما يكون عنها.
وأضافت النجمة حلا شيحة موجة رسالة لزوجها الداعية معز مسعود: "لن اسمح لاحد الكلام عنه و لن اسمح بأي تصور خاطئ عنه بأي شكل من الاشكال معز طول عمره له رؤيته الواضحة في الدين و حتي في الفن و هو ليس مع اي جماعة او فئة معينة هو يمثل نفسه و له افكاره وارائه العلمية و الدينية المختلفة الجميلة و ليس لاحد ان يصنفه او يضعه في اي قالب فقط لأن هواه لا يوافق ما يمثله معز..هو في ايه في بلدنا الايام دي بنحارب و نصارع في بعض و عايشين في قصص وهمية من نسج خيالنا عن بعض.
وتابعت حلا حديثها قائلة: "هو خلاص اي حد يتكلم بلغة الدين لازم يبقي متطرف او اخواني هو مبقاش في مسلمين وسطيين طبيعين هو ليه كل انواع الهجوم ده علي اي حد..انا زعلانة من والدي جداً لانه يعرف معز كويس جدا و قعدوا مع بعض كتير ووالدي يحبه جدا و شاف منه كل خير ومعز زيي اتجوز 14 سنة من عمره و كان مستقر في حياته و عنده ثلاث اولاد ربنا يخليهمله جمال ماشاء الله و عمره ما كان بتاع ستات زي ما بيتقال كلام لايليق ابدا و في الاخر زيي لم يكمل جوازه و حدث الطلاق و كلنا معرضين لده طبيعي انه كان بيحاول زي اي راجل محترم انه يلاقي استقرار في حياته في الحلال و متوفقش اكتر من مرة و دي مش حاجة تعيب أي حد ، والحمد لله اتقابلنا و تلاقينا لان ظروفنا قريبة جدا و عندي اولاد مثله و اولادنا شبه بعض الحمد لله و استقرينا احنا الاتنين ليه ده يزعل الناس بدل ما ندعي لبعض بالخير بقينا نتصيد لبعض ونخوض في اعراض بعض هو حصل في مجتمعنا ده احنا جرالنا ايه".
واختتمت حديثها قائلة: "في الاخر بوجه كلمة لوالدي الحبيب ان لا يصح ابدا كلامك مع كامل احترامي لك و للجميع .انا الحمد لله سعيدة في حياتي و مع زوج اتشرف انه زوجي و بعتز بيه و احنا اصدقاء قبل ان نكون أزواج و كل كلمة اكتبها و قلتها نابعة مني و انا متدينة بطبعي زي اي ست مصرية بتحب دينها وده لا يعيبني. وتديني اللي بدأ من اكتر من 15 سنة من المنطقي ان معز مش هو سببه..مش محتاجة حد يخطفني او يكتب عني او يوجهني.. هذا كلام لا يليق .دعوا الخلق للخالق و كل واحد يخليه في حاله .وياريت نسمع من بعض بدل ما نسمع عن بعض .احسنوا الظن".
ويذكر أن الفنان التشكيلي أحمد شيحة، قد أوضح بانه يشك في أن يكون تصريحها الأخير حول بعض مشاهدها في فيلم "مش أنا" بدافع منها.
وخلال مداخلة هاتفية له مع الإعلامي محمد الباز، مقدم برنامج "آخر النهار"، عبر شاشة قناة "النهار"، شرح والد حلا شيحة رأيه قائلا: "أثناء تصوير الفيلم كانت سعيدة بيه جدا، وكانت بتقول لي هيبقى فيلم هايل وهيحقق نجاح كبير."
