”حصلتلي مشاكل كتير”.. ريهام سعيد تعلن اعتزالها الإعلام
شاركت الإعلامية ريهام سعيد متابعيها وجمهورها بإعلانها خبر اعتزالها الذي فاجئت به الجمهور حيث جاء ذلك عبر صفحتها الرسمية بموقع التواصل الاجتماعي.
وكتبت ريهام سعيد عبر صفحتها بـ "انستجرام": "فكرت كتير قبل ما أكتب البوست ده، أنا اعتزلت التمثيل سنة 2015؛ لأني حسيت إن صاحب بالين كداب، وإن التمثيل مأثر على مسيرة الخير اللي ابتديتها من سنين طويلة".
وأضافت: "عشان الوقت والمجهود اللي بعمله، لكن عشقي للتمثيل اللي هو دراستي ومهنتي الأولى قبل الإعلام، رجعت أمثل تاني، وأنا لسه في نظر المخرجين والمنتجين مذيعة عايزه تمثل.. كنت عارفة إني عشان أخد مكان كممثلة لازم أسيب الإعلام، زي- مع حفظ الألقاب- داليا البحيري وبسمة ودينا فؤاد ودينا الشربيني" وغيرهن".
وتابعت كلامها: "بس مكنتش قادرة أسيب رسالتي اللي كانت مهمة أوي وقتها.. أنا حصلت لي مشاكل كتير من المهنة دي، بتأثير باطل من السوشيال ميديا من منافسين وأعداء، أنا تعبت وحاسة إني قدمت كل اللي ممكن يتقدم، والدولة عامله اللي عليها، ومش محتاجين دور المجتمع المدني في مساعدة الناس".
واستكملت قائلة: "ولكن أنا ليَّ الشرف إني اشتغلت في المهنة العظيمة دي، اللي ليها رسالة سامية وعظيمة، وليَّ الشرف إني كنت إعلاميه في أصعب وقت مر على الإعلاميين أيام حكم الإخوان، والحمد لله كان لينا موقف واضح وما اتغيرش ولا دقيقة.. أنا الحمد لله حققت كتير في التمثيل، وكل اللي اشتغلته علِّم مع الناس، واشتغلت أعمال كلها قيِّمة، بس بعد ما جالي السكر وشوية مشاكل تانيه؛ قررت أعمل اللي بحبه، أنا بكل أسف بعلن اعتزالي الإعلام تماما، وهركز كممثلة، وهاطلب من الدكتور أشرف زكي إنه يساعدني إني أغيَّر الفكرة الموجودة في أذهان المخرجين والمنتجين إني مذيعة".
واستطردت ريهام سعيد: "رسالة للأستاذة كاملة أبو ذكري، ومش مكسوفة، نفسي أوي أمثل معاكي، حتي لو مشهد، ده من أحلامي، خطوة صعبة وفيها ريسك كبير، بس على الأقل أجري ورا حلمي حتى وأنا في السن ده.. جه الوقت إني أستمتع باللي بعمله وبحبه، خصوصا لما يكون في عَصر ولا فيه واسطة ولا محسوبية، اللي هيجتهد هيوصل.. ماتسيبوش حِلمُكم مهما فات الوقت".
اقرأ أيضًا: نوال الزغبي تشوق جمهورها لانتظار أغنيتها الجديدة التي تطرحها غدا
واختتمت كلامها: "بشكر جمهوري من الأمهات والشباب والأطفال اللي دايما بيدعموني، وحبوا برامجي واتعلموا منها، وبشكر ربنا على 20 سنة، اداني الفرصة فيها إني أقضي حوائج الناس، وأقدم كل ما هو مفيد، فخورة بكل حلقة، وبكل حرف قدمته، 20 سنة تعب وسهر وتصميم على تقديم الحقيقة، أنا آسفة ليكوا، بس التمثيل رسالة برضو، وهو حلمي الأساسي اللي اتأخرت أوي عشان أحققه، يا رب وفقني وساعدني".
