صفية العمري: ليالي الحلمية تاريخي وأحمد زكي لن يتكرر
حلت اليوم الفنانة صفية العمري ضيفة ببرنامج "أسرار النجوم" المذاع عبر إذاعة نجوم إف.إم، وأدلت بعديد من التصريحات.
وقالت العمري: "مسلسل ليالي الحلمية تاريخي وهو السبب اللي مخليني مش عارفة أشتغل، والعمل كله مكنش فيه لفظ خارج، وتاريخ مصر كله من وقت الملك فاروق لغاية عصر مبارك في المسلسل ده، بنشوف حقبة تاريخية كبيرة وبنشوف وجوه أصبحوا أبطال النهارده".
وتابعت: أنا كنت بستمتع ومكنتش بنام من الأدوار اللي بعملها في المسلسل ده، وكنت بذاكر شخصيتي كويس جدًا حُبًا في المسلسل وكنت أرجع من الاستوديو أسهر عشان أراجع دوري بكره.. والمسلسل دا كله عظمة والعمل شبعني تمثيل".
وتمنت العمري أن تنجب مصر فنانا مثل الراحل أحمد زكي، مؤكدة: كنت سعيدة وأنا شغالة معاه، وأكدت أنه من أروع الفنانين الذين عملت معهم، وتابعت: "أحمد زكي كنت بفهمه وبتعايش معاه.. وللأسف مفيش حد من الفنانين للآن قدر يعوضه، ربنا يرحمه".
كما تحدثت عن تجربتها في فيلم على باب الوزير مع عادل إمام قائلة: كانت تجربة رائعة جدًا وساعتها كنت لسه جديدة والدور بالنسبة لي كبير إني أقف قصاد الفنان الكبير العظيم عادل إمام، وسبب نجاحي فيه إني كنت ملتزمة وبحب الفن والعمل اللي بعمله.
وتابعت "الفن معايشة واحترام لعقلية المتلقي للعمل الفني، مضيفة أن النجوم القدامى كانوا أكثر تميزًا بالتزامهم تجاه ما يقدمونه للمشاهد".
وأكدت العمري أنها تحترم مهنة الفن والتمثيل، وتابعت: "الأجيال الجديدة لديهم فكر معين وتطلعات، بس شغلهم فين؟ وإيه اللي عملوه في الفن وتاريخهم فين؟" وأضافت: لو الناس حبتني هينتظروني، وأنا قدمت أكتر من 100 فيلم ومسلسل، وتركت إرثًا للناس ليشاهدوه".
تمتلك الفنانة المعتزلة صفية العمري، تاريخًا فنيًا كبيرًا في السينما والتلفزيون، وحكت خلال الحلقة عن هذه الأعمال والكواليس التى لا يعرفها الجمهور، وتعاونها مع كبار نجوم الفن فى مصر أو الوطن العربي.
