عمر كمال يطرح حلا لإنهاء أزمة مطربي المهرجانات (فيديو)
حرص الفنان عمر كمال، على تقديم حلا لإنها أزمة نقابة المهن الموسيقية، برئاسة الفنان هاني شاكر، مع مطربي المهرجانات الشعبية.
وتحدث عمر كمال عن أزمة النقيب، مع مطربي المهرجانات، في مداخلة هاتفية مع الدكتور معتز عبد الفتاح، مقدم برنامج "تحت الشمس" عبر شاشة قناة "الشمس"، قائلا: "أنا أولا نص أعمالي أغاني ونصها مهرجانات، وأنا عندي حل للخناقة دي كلها، قرار الأستاذ هاني شاكر فيه جزء كبير صح وأنا معاه قلبا وقالبا، لأنه بجد في ناس بتوع مهرجانات بيقولوا كلام مينفعش يتقال خالص، وأنا كعمر بتأذي منه، والفئة دي فعلا لازم تتمنع، أنا بقول ده إزاي يتقال، لأنها شتايم علني وعيني عينك، النوع ده لازم يتمنع".
اقرأ أيضا: بسبب «إنسان مميز».. مايان السيد ومنة عرفة في وسط البلد
وتابع: "لكن في نفس الوقت نقابتنا المحترمة بجد أجازت الراب، ومنحت الراب مساحة كبيرة جدا على المسارح وشرعية، وما شاء الله برضو بيعموا بلاوي أكتر من المهرجانات وشغالين، أغاني كتير جدا ليهم فيها خناقات برضو وشتائم وقلة أدب، ومع ذلك النقابة اعترفت به وعملتله شعبة، طيب ما إحنا نعمل شعبة مهرجانات ببساطة".
واختتم عمر كمال، حديثه موضحًا حال لإنتهاء الأزمة، بين النقيب ومطربي المهرجانات الشعبية، قائلا: "زي ما عمر كمال راح النقابة ومضى إقرار أنه أي أغنية هينزلها هتُجاز من الرقابة، ده يتعمم ونعمل شعبة للمهرجانات، لكن موضوع الأصوات ما هو برضو بتوع الراب مش أصوات، بتاع الراب مش بيدخل يمتحن في الأطلال وعمر الخيام يعني، ما هو بيدخل يغني راب، يبقى بتاع الراب يدخل يغني راب، وبتاع المهرجانات يدخل يغني مهرجانات، خلوا المهرجانات فن زي الراب".
مطربي المهرجانات
ويذكر أن نقابة المهن الموسيقية، برئلسة أمير الغناء العربي هاني شاكر، قد أعلنت أسماء الممنوعين من الغناء وشملت: حمو بيكا وحسن شاكوش وكزبرة وحنجرة ومصطفي زكريا الشهير بمسلم وأبو ليلة وأحمد قاسم الشهير بـ"فيلو" وأحمد موزة وحمو طيخة وريشا كوستا وسمارة وشواحة وولاد سليم والعصابة والزعيم وعلاء فيفتى وفرقة الكعب العالى ومجدى شطة ووزة وشكل وعمرو حاحا.
