ريهام سعيد تثير الجدل: «حاسة إني هموت قريب».. تعرف على وصيتها
فوجئ الجمهور في الساعات الأولى من صباح اليوم الثلاثاء 22 فبراير، بمنشور مثير للجدل للإعلامية ريهام سعيد، تُخبر متابعيها أنها تشعر بأنها سترحل عن عالمنا قريبًا.
منشور ريهام سعيد المثير للجدل
كتبت ريهام سعيد، عبر حسابها على "فيسبوك": "أقسم بالله كل حرف هكتبه صادق ومن قلبي، أنا حاسة إن أنا هموت قريب عشان كده هبعد عن السوشال ميديا عشان أقعد مع أولادي أكتر وقت ممكن خصوصًا ابني الصغير".
هل تعرضت ريهام سعيد للسحر؟
وتابعت ريهام سعيد، حديثها وقالت: "يمكن سحر يمكن اكتئاب ويمكن حقيقي، غالبًا إحساس الظلم كان بيقتلني بالبطيء في يوم من الأيام الدنيا قامت عليا عشان تعلب أما المعراج وإنكارها عادي. تامر أمين يغلط في الصعايدة قاصد أو مش قاصد يتوقف ٣ شهور لكن أنا أعمل أكبر حملة للسمنة وأعالج الآلاف من السمنة وعمليات ببلاش ويفتروا عليا ويقولوا إني قلت إن ريحتهم وحشة واتوقف سنة".
واستكملت ريهام سعيد حديثها، وقالت: "فتاة المول ولا تحرش ولا نيلة واجيب فيديو وهي معاه محدش يشوفوا واتحاكم وأدفع اللي ورايا واللي ادامي لسما المصري عشان تتنازل لأن هي اللي زقتها عليا. وغيره وغيره وغيره، كفاية أننا عالجنا أعداد مهولة من الشباب من المخدرات وروحت أماكن خطر جدًا عشان أوعي الناس بدل ما اتكرم ألاقي نفسي نايمة في أوضه متر في متر مع تاجرة مخدرات".
هؤلاء لن تسامحهم ريهام سعيد
وأردفت ريهام سعيد حديثها، وقالت: "البرنامج يتوقف أطفال تموت ومدرسة ذوي الاحتياجات الخاصة اللي فاتحنها تتقفل وتطلع ريهام آفاقة وكدابة، لو فضلت أحكي هاحكي كتير بس أنا موجوعة ومش قادرة احكي انتوا ظالمين بتمشوا بكلمه من غير، ما تشوفوا ولا تفهموا، عندي كلام كتير أقوله على كمية مواقف فيها ظلم رهيب. لو موت أنا مش مسامحة. مش مسامحة أي حد قال عليا كلمة واحدة مش حقيقية أو على السمع..مش مسامحة أي صحفي كتب عني كلمه ظلم مش مسامحة أي واحد كتب كومنت موت بيها أطفال القلب، كفايه إن أي حاجة الإعلام بيتكلم فيها دلوقتي أنا متكلمه فيها من عشر سنين. هنزل قبري مش مسامحة هاني عزب ولا أيمن سليم ولا ريم ولا بسمة ومحمد راضي وعلاء الكحكي و ووليد مصطفي ومحمود مملوك وأحمد عبد العزبز وجورج قرداحي وكتير غيرهم، مش مسامحة ولا هسامح، مش مسامحة اللي بتسحرلي كل شوية مش مسامحة حسن شاكوش و اللي عمله في أولادي، مش مسامحة أي حد ساهم في خراب بيتي وضياع مجهود سنين ومش مسامحة أي حد أنا معرفوش ضدي وبيحاربني وأنا مش عارفة".
اقرأ أيضًا..
«بعد اتهامها بالإنجاب دون زواج».. قمر تعلن عن والد طفلتها وأول صورة له
وصية ريهام سعيد
وكشفت ريهام سعيد عن وصيتها أثناء حديثها وقالت: "المهم أني أجهز للقاء ربنا أعوض الصيام وأصلي كتير وأتصدق وادعي، أدعولي انتوا كمان ربنا يغفر لي، ريهام بتجيب مشاكل طب وراحت فين المشاكل لما قعدت في البيت؟ ما هو اللي فيه طبع مابيغيروش والله عشان اللي كانوا بيعملوا المشاكل اتهدوا لما اعتزلت؟ عشان أنا مش على الشاشة مليش قيمة ومفيش مصلحة آد إيه الناس وحشة كلمت ناس كتير يساعدوني أحقق حلمي وأمثل مش عايزه اقولكوا الرد وناس ياما وقفت جنبهم، كل دور أعمله المخرج يقول لي إنه هايكسر الدنيا بس هي ماشية بالشطاره؟".
وقالت: "أنا عايزة اقولكوا إلى اللقاء يمكن لما أخف لو عيانة يمكن لما اتعالج من السحر لو مسحورة، يمكن في الجنة بإذن الله لو مت، ماتظلموش حد لأن أنا بعد ما تعبت أوي أوي ظلمتوني أيوة حتى لو ليا أعداء انتوا ساعدتوهم".
وقالت: "آخر حاجة هوجهها للريس أنا لو موت وصيتي أولادي يعرفوا أنا حققت وعملت إيه لأن أكيد حضرتك مش عارف برضوا.. أنا أولادي اتعذبوا ورايا في المحاكم والقضايا.. أنا ابني كان عنده شهرين زارني في السجن.. أنا بهدلت أهلي معايا عشان ولا حاجة كنت فاهمة إني هصلح الكون.. أنا آسفة إني نجحت أنا أسفة إني كنت عايزة كل الناس تعمل خير أنا أسفة إني معملتش علاقات تسندني جوه أو بره مصر.. خسارة المجهود اللي راح بدون تقدير لكن آجري بإذن الله عند ربنا.. متوجعوش حد تاني إحساس الظلم مميت.. إحنا كنا البرنامج رقم واحد في المشاهدة في الوطن العربي عشر سنين و السابع على العالم وتعبنا أوي.
وتابعت: "قدر الله و ما و شاء فعل حقي عندك يا رب.. في الآخر السيرة أهم من السمعة، لأن السمعة دي الحاجات اللي بتسمعها وماشفتهاش وهي مش حقيقة لكن السيرة دي اللي موجودة في كل بيت فيكي يا مصر دي سيرة معاملتك للناس والحاجات اللي ربنا جعلني سبب إني أعملها وهو ده المهم .. بعد ما أموت ماتقولوش دي بتمثل أنها ماتت زي ما كل مرة كنت بعيا فيها الصحفيين كانوا بيطلعوني كدابه.. حسبي الله ونعم الوكيل".
