الخطيب: إفريقيا ضاعت من الأهلي بمساعدة ناس من مصر.. وموسيماني رحل بسبب مشاكل نفسية

وجه محمود الخطيب، رئيس مجلس إدارة النادي الأهلي، رسائل نارية لجماهير القلعة الحمراء.

وقال الخطيب في تصريحات عبر قناة الأهلي: "من ثوابت النادي عدم الظهور الإعلامي الكتير، لكن المرة دي كان لازم نطلع نتكلم مع حضراتكم لتوضيح بعض الأمور بعد الإخفاق الأخير اللي بيحدث لأنكم الداعم الأول والرئيسي لمنظومة النادي الأهلي".

وأضاف: "في وقت الفرح اللي هي كتير بتفرحوا بينا بزيادة ووقت الإخفاق لازم احنا نتحمل اللوم والانتقاد".

وتابع: "واجبنا إننا نعترف بأي تقصير وهناك تقصير ونبادر بالإصلاح مش عيب يحصل غلط لكن العيب إننا منشوفش الغلط".

وواصل: "البطولة الإفريقية الأخيرة ضاعت للأسف بمساعدة ناس من مصر".

وأكمل: "جمهور الأهلي بيلوم اللاعيبة من حب ودعم الجمهور ليهم لأنهم شايفين إنهم أحسن بكتير بس عايزين نفتكر إن نفس اللاعيبة دي من 3 شهور في نهائي أفريقيا ومن 4 شهور خدوا برونزية كأس العالم للأندية".

وأردف: "حللنا آخر 3 مواسم من فترة وتوقعنا هبوط للمستوى، 3 مواسم متلاحمة من غير راحة، لاعيبة الأهلي أكتر لاعيبة لعبت ماتشات، وعدد السفر، تم استنزاف اللاعيبة دي بالإضافة إلى ضغط الماتشات المحلية تسببت في إصابات كبيرة وكتيرة جداً".

وتساءل محمود الخطيب: "هل بيتم عقاب الأهلي لأنه بطل وبيشارك في بطولات عالمية؟".

وأضاف: "من العوامل اللي بتحبط الفريق، التحكيم من السنة اللي فاتت، علامة استفهام كبيرة وتحت ألف خط .. أدوا الناس حقها ويكون في عدل، وبقى واضح للكل إن في أخطاء تحكيمية فجة كلها ضد الأهلي ومجاملات لاتجاهات أخرى".

وتابع: "بيتسو موسيماني حقق حاجات كويسة جدا، مين اللي عمل الحملة اللي عليه؟ موسيماني كان في المغرب في حاجة تبع الفيفا، كلمناه لما رجع قولناله ايه الدعم اللي أنت عايزه؟ موسيماني قالنا مفاجأة إنه صحياً ونفسياً مش قادر يكمل وقولناله فكر لأننا محتاجينك بس اعتذر".

وأوضح الخطيب: "في تدعيم قوي جداً بلاعبين هنكون محتاجينهم الفترة اللي جاية في بعض المراكز ، وده مبيقللش من اللاعيبة الموجودين اللي لازم يستريحوا وياخدوا نفسهم شوية".