الفن

”الراب مش محتاج لنقابة”.. مولوتوف يعترض على قرارات مصطفى كامل

الأحد، 6 نوفمبر 2022 10:16 مـ بتوقيت القاهرة

أثارت قرارات الفنان مصطفى كامل نقيب الموسيقيين، بشأن ضرورة وجود فرقة موسيقية مع كل مطربي الراب، الجدل والاعتراض من قبل بعض مطربي الراب وأبرزهم الرابر "مولوتوف".

أطلق مطرب الراب والبروديوسر "مولوتوف" حملة تحت شعار "قاوم بالمزيكا"، وذلك اعتراضًا على قرارات نقيب المهن الموسيقية باشتراط وجود فِرْقَة مكونة من 6 أفراد مع كل مطربي الراب، موضحًا أنه يرى في ذلك القرار التقييد لحريتهم في الغناء والإبداع.

أعرب "مولوتوف" عن استياءه من قرارات نقيب الموسيقيين، وذلك بواسطة لقاءه مع موقع scene noise، حيث قال: "حقي يكون عندي حرية في الحفلة، والقرار ده أكيد أثر عليا وبشكل مباشر لإني عازف ورابر وموسيقي ودي جي، أنا بحاول أطور الحركة الفنية في مصر وأخليها توصل للعالم كله وهما بيهدموا ده".

وعند سؤاله عن علاقته بنقابة الموسيقيين، أضاف: "مبحتكش بيهم خالص، وهما موجهوش ليا أي إعاقة بشكل مباشر وأنا دايمًا مرتبط بالشارع".

وأتبع: "موقفهم ضد مفهوم الراب، لإن الراب فن شارع ومش محتاج للنقابة، وفي ناس كتير في مصر بيحاولوا يطوروا الراب، لكن في ناس بتعتبره سلعة تجارية وده طبعًا بيأثر على الموسيقى وعلى الفنانين، وأنا بعتبر ده إهانة لمصر لإننا مش قليلين في المهرجانات والراب وعندنا تاريخ كبير جدًا".

وبالحديث عن ما يتعرض له فن الراب والمهرجانات، قال: "دايما بيكون في حرب على الفن الحقيقي، لأنه بيكسر القيود وبيقدر يعبر عن نفسه بكل حرية، والحرية هى اللي بتسمح بظهور أنواع جديدة من الفن زى المهرجانات، وإحنا بنتحارب من الناحيتين من ناحية الناس اللي بتستغل الفن بطريقة مادية ومن ناحية تانية بنتحارب من الناس اللى عندها خوف وجهل من أى حاجة مش مألوفة".

وعن حذفه لبعض أعماله مع مروان موسى وعفروتو، أوضح أن هدفه هو الاعتراض على الموقف وتوضيح مدى غضبه من القرارات، ولازم نقاوم القرارات دي بكل الطرق الممكنة.