إبراهيم عكاشة يكتب: فاكرين لما الرئيس اشترى الميسترال؟

بيقولك تركيا وليبيا مش عاجبهم ترسيم مصر لحدوها البحرية في الاتجاه الليبي.
بس مجرد زعلانين وبيطلعوا تصريحات بكده.
تقصد إيه يا إبراهيم هما يملكوا غير انهم يقولوا الكلمتين دول المحشورين في زورهم وخلاص؟!
آه.. كانوا يملكوا يا عزيزي.. بس كانوا..
تركيا كانت تملك ضرب مصالحك الاقتصادية في البحر الأحمر بقوة أسطولها البحري.
نرجع كدا بالذاكرة شوية.
فاكرين لما السيسي اشترى حاملتي الميسترال؟!
ساعتها ماكانش في أي كلام عن ترسيم حدود بحرية ولا آبار غاز ولا أي حاجة.
وقتها الإخوان وعملائهم الداخليين قالولك هو بيشتري حاملات طائرات ليه هو إحنا بنحارب!
أنا نفسي لما السيسي اشترى مقاتلات ميج29 نسخة بحرية، استغربت وقولت دي أول مرة نعملها ونشتري مقاتلات مخصصة للبحر هو الراجل دا شايف إيه إحنا مش شايفينه. بس كان عندي ثقة مطلقة فيه إنه بيعمل الصح.
وكانت الثقة كالعادة في محلها وفعلاً كان شايف اللي إحنا مش شايفينه.
النهارده لو ماكانش عندك الأسطول البحري القوي دا، كان زمان تركيا وأصحابها الشرق أوسطيين، وليبيا وأصحابها الأوربيين، وقفولك في البحر وطلعت من المولد بلا حمص.
طيب دا يقول إيه؟!
يقول إنك لازم كمواطن يكون عندك ثقة في رئيسك علشان هو أمامه التقارير والمعلومات والتقديرات اللي مش أمامك ولا يمكن يقولك عليها إلا لما الأيام تكشف لك حقيقة الأمور كمواطن برضو.
طبّق بقى المبدأ دا في تصرفات كتير عملها السيسي هتلاقي إنك كنت غلطان ولا تملك المعلومة أو حتى ربع الصورة اللي هو شايفها بحكم منصبه.
أقولك مثال كمان؟!
فاكر لما عمل قاعدة محمد نجيب العسكرية في الناحية الغربية من مصر، وطلع إعلام الإخوان يقولك عملها ليه في الغرب والتهديدات دايمًا من الشرق واتهموا الدولة بالغباء؟!!
بعدها بشهور ظهر التهديد الشرقي ووضعنا الخط الأحمر في ليبيا (القائم حتى الآن) وتحملت قاعدة محمد نجيب التحرك شرقاّ لحماية المصالح المصرية.
أرجوك يا عزيزي.. أنت مواطن وأنا مواطن.. لا نملك المعلومات. والله لا نملك فعلاً. أي حاجة إحنا بنتكلم فيها كمواطنين هي مجرد اجتهادات، وليست معلومات مؤكدة. المعلومات المؤكدة فقط أمام رئيس الجمهورية.
رددها ورايا ما تتكسفش. أنا مواطن.
أما لو هترد عليا وتقولي إنك عايز تعرف المعلومات دي تحت بند الشفافية، هقولك محمد مرسي عملها وذاع الشفافية دي على الهواء والنتيجة اننا كنا أضحوكة الكوكب شهور طويلة.
لكل دولة خزائنها.. وصدقني مفاتيحها مش على السوشيال ميديا، ولا هتكون.

اقرأ أيضا.. إنه صاحب الجلالة «الموت»