كمال أبو رية في حواره لـ«الطريق»: بنتي عملة نادرة في حياتي.. ومينفعش أبطل تمثيل
يتمتع الفنان القدير كمال أبو رية بقدرته الهائلة في تجسيد شخصية الصعيدي، وهذا ما حدث في مسلسل عملة نادرة، إذ استطاع أن يجذب الجمهور له مجددًا باللهجة الصعيدية التي تمكن منها، لدرجة أن تصرح نيللي كريم بطلة العمل أنها كانت تركز في آداءه هو والفنان جمال سليمان للاستفادة منهما.
جريدة "الطريق"، التقت بالفنان الكبير كمال أبو رية، للحديث عن مسلسل عملة نادرة وأشياء آخرى.
إلى نص الحوار..
كيف جاء ترشيحك للمشاركة في مسلسل عملة نادرة؟
شركة العدل جروب رشحتني للدور ولما اتعرض عليا كنت حريص جدًا إني اتعاون معاهم، خاصًة بعد ما قرأت السيناريو.
أول مرة تتعاون مع نيللي كريم.. كيف رأيت هذا؟
بحب نيللي جدًا على المستوى الشخصي، لأن عندها صفات جميلة زي انها طيبة وكمان عنده حتة رجولة وجدعنة، ومبسوط جدًا اننا بقينا أصحاب.
وماذا عن العمل مع جمال سليمان؟
الفنان جمال سليمان بتجمعني بيه علاقة صداقة بعتز بيها من قبل ما نشتغل مع بعض في مسلسل عملة نادرة، وخلال الأحداث استمتعت جدًا رغم اننا طالعين قدام بعض في صراع كبير وكل واحد فينا كبير عيلته وعنده تجارته الغير شرعية.
هل تعرضت لصعوبات خلال التصوير؟
رغم إني قدمت قبل كده كتير كتير من الأدوار الصعيدية، لكن بالتأكيد إني اتكلم بيها مكنش سهل لأنها مش لهجتنا اللي بنتكلم بيها، لكن برضه وجود المصحح اللغوي سهل الدنيا علينا شوية في البروفات.
ما رأيك في تقبل الجمهور للأعمال الصعيدية؟
بعتبر إن المسلسلات الصعيدية ليها قبول عند الجمهور المصري، خصوصًا لو كان العمل ده مكتوب كويس واتقدم بشكل كويس.
هل تشبعت من تقديم الأعمال الصعيدية أم ستقدمها مجددًا؟
أكيد ممكن اقدمها تاني، أنا شبعت من التمثيل اصلًا وبشتغل دلوقتي عشان مينفعش أوقف شغل، أنا اشتغلت 35 سنة وكنت محظوظ إني قدمت شخصيات مختلفة زي الصعيدية والكوميدية والتراجيدية والسيرة الذاتية والشخصيات الخفيفة كمان، لكن مينفعتش مشتغلش، هقعد في البيت يعني؟
ما الذي تفقده الدراما حاليًا؟
المشكلة في السيناريوهات اللي بتتقدم دلوقتي إن بتكون في فكرة كويسة لكن مش بيتم معالجتها بشكل صحيح.
صرحت من قبل انك تحب أمينة خليل..
ايوة، بحب أشوف أمينة خليل لأنها مميزة جدًا وفيها حاجة مختلفة زكي منى زكي ومنة شلبي.
اخيرًا.. ما هل العملة النادرة في حياة كمال أبو رية؟
بنتي حبيبة هي العملة النادرة، مش هتتكرر وعندما صفات حلوة جدًا وهي اللي بتدرني وبتدير البيت.
هل دخلت مجال الفن؟
هي دلوقتي مساعدة مخرج، بعد ما اتخرجت من الجامعة الألمانية قسم الفنون التطبيقية الفنية.
