مدحت صالح: «كانوا مسمييني مطرب كشكول في شبرا والشهرة مغيرتنيش»
كشف الفنان مدحت صالح عن فترة طفولته وبدايات مشواره الفني، مؤكدًا أن الشهرة لم تغيره تمامًا وهذه نعمة من نعم ربنا وكان هو حب الجمهور، مشيرًا إلى أنه كان يسمى بمطرب كشكول في بداياته في شبرا.
وقال مدحت صالح خلال لقاءه مع الإعلامي محمود سعد في برنامج Sold Out: "الشهرة مغيرتنيش وبعتبرها جزء من نعم ربنا عليا، فيه ناس بعد ما بيوصلوا لمرحلة الشهرة بيزهقوا ويتضايقوا ويتخنقوا، وفي الأول بيكون بيجري ويلهث وراها ولما بتجيلهم بيزهقوا، لكن دي نعمة بشكر ربنا عليها وعمر ما كان حب الناس والجمهور حاجة تزهق أبدًا من أول المشوار والهدف بتاعنا إننا نوصل للحتة دي".
تصريحات مدحت صالح مع محمود سعد
وأضاف مدحت صالح: "الاستقرار النفسي أكبر نعمة إنك تكون راضي ومبسوط وبتحافظ على النعم اللي ربنا ادهالك، وأنا اتعلمت ده من أساتذتي عبد الحليم ومحمد الموجي ومحرم فؤاد وكنت بقوله أبويا؛ لأنه بيعتبرني زى ابنه، ودكتور يوسف شوقي وأبلة فضيلة".
اقرأ أيضًا: محمد عبد المطلب «ملك المواويل» وصنع أسطورته من «ساكن في حي السيدة»
وتابع مدحت صالح: "زمان كانوا مسميني مطرب كشكول في روض الفرج بشبرا، كنت بغني في الأفراح وفي الحواري وفوق سطوح البيوت، عشان بغني أغاني الناس القديمة ست أو راجل، فالكشكول ده عبارة عن إيه؟ تراثنا، عايز تبقى متفوق فلازم يكون عندك رصيد أكبر، مينفعش حد يقولك غنيلي تفضل تغنيله نفس الأغاني".
وأوضح: "زمان كنت بسمع محطة أم كلثوم في الإذاعة وبحضر الكشكول ولما الأغنية بتتعاد براجع اللي حفظته، فمليت الكشكول بأغاني كتير متنوعة لدرجة إني بقيت من أكثر الفنانين اللي عليهم طلب في شبرا، وكنت عايز أبقى كويس وليا رصيد وده حبًا في الفن والغناء خلاني بقيت راجل بينحت كتير".
اقرأ أيضًا: ألفريد هيتشكوك.. رحلة «سيد التشويق» من الحبس في الزنزانة إلى أفلام الرعب
