أنغام: «طفولتي مكنتش سعيدة.. وعمري ما أنسى ضرب أبويا لأمي»
تحدثت المطربة أنغام عن طفولتها، وفترة تعلمها للموسيقى في سن السادسة من عمرها، لافتة إلى أن طريقة تعليمها كانت قاسية.
وأضافت خلال لقائها في برنامج AB TALKS: "تعلمت الموسيقى وأنا عندي 6 سنين بطريقة كانت قاسية، وكنت بلعب بيانو وأنا صوابعي متكسرة من البرد وساعات نومي قليلة، ولكنه كان مسئولية كبيرة، ورغم ذلك بشوف نفسي محظوظة".
وأضافت: "فترة طفولتي ما كنتش سعيدة وكانوا بيتعاملوا معايا على إني كائن فاهم، وكنت بشيل حاجات فوق طفولتي، وده جزء من معاناتي في الطفولة، وأمي كانت طفلة من جواها وعلى الحياة اللي كانت فيها".
وتابعت: "استوعبت أمور وأنا طفلة مكنتش حابة استوعبها، وحياة فيها أب وأم مش سعداء مع بعض، والأم أكتر مكنتش سعيدة كانت مقهورة ومش محبوبة كفاية من الراجل، وده بينعكس على الطفل اللي في البيت".
وكشفت أنغام أصعب المواقف التي مرت عليها في طفولتها، قائلة: "عمري ما أنسى أول مرة أبويا مد إيده على أمي، وأنا كنت بعشق أبويا، وهما في اليوم ده معرفوش يداروا، لزقت نفسي في الحيطة وهو كان جاي يسلم عليا قولتله لأ متسلمش عليا، زعلت جدًا علشان أمي واتاخدت منه وشوفته شخص تاني".
اقرأ أيضا: علياء بسيوني تعلن طلاقها من أحمد سعد: «أكبر مقلب وربنا ينتقم منك»
