نجل أشرف مصيلحي يوجه له رسالة مؤثرة: «دلوقتي هعرف أتكلم معاك لحد ما أجيلك»
أعرب يوسف نجل الفنان الراحل أشرف مصيلحي، عن شوقه الكبير لوالده، حيث وجه له رسالة مؤثرة عبر حسابه على "انستجرام"، مشيرًا إلى رأى حب الناس الكبير له بعد وفاته وسيظل فخور به وبحمل اسم طوال العمر، وأكد أن علاقتهما كانت أقرب لعلاقة الصحاب وليس أب وابنه.
نشر يوسف أشرف مصيلحي بعض الصور التي تجمعه بوالده، وعلق: "الله يرحمك يا أطيب وأحن وأجدع أب في الدنيا، كان نفسي تكون موجود وتشوف حب الناس وروحك اللي موجودة في كل حد فينا، وتشوف الناس بتقول عليك ايه من أصغر واحد لأكبر واحد".
نجل أشرف مصيلحي يوجه له رسالة مؤثرة
وتابع نجل أشرف مصيلحي: "أنا مش فاكر أنك عملت حاجة ضايقتني ولو لمرة أو شدينا مع بعض حتى زي أي أب وابنه وده عشان إحنا كنا صحاب أكتر وكنت بتفهمني وعارف دماغي، عارف أنك مرتاح دلوقتي أكتر بكتير ومبسوط وأنت شايفنا متجمعين وحاسس بكل المحبة اللي كانت موجودة اليومين دول وهيفضلوا موجودين على طول".
اقرأ أيضًا: بعد وفاة الفنان أشرف مصيلحي.. تعرف على أعرض سرطان المخ وطرق الوقابة منه
وأضاف: "دلوقتي أنا هعرف اتكلم معاك وعارف أنك سامعني يمكن أكتر من آخر فترة كنت موجود فيها وسطنا عشان كنت تعبان ومش بعرف اتكلم معاك، عايزك تعرف إني بحبك قوي وهفضل شايل اسمك وأنا فخور إنك أبويا لحد لما نتقابل إن شاء الله، بجد بحبك أوي يا بابا وعارف أنك أكيد في الجنة بإذن الله".
وفاة أشرف مصيلحي بعد صراع مع المرض
وكان قد رحل الفنان أشرف مصيلحي عن عالمنا مساء يوم الأحد الماضي، وذلك بعد صراع طويل مع مرض السرطان الذي استمر لمدة 3 سنوات، وتدهورت حالته الصحية مؤخرًا، ورحل تاركًا وراءه إرثًا كبيرًا من الحب في قلوب جمهوره وزملاءه، وتم تشييع الجثمان من مسجد المشير طنطاوي بمنطقة التجمع الخامس، وأقيم العزاء أمس الثلاثاء في نفس المسجد بحضور عدد كبير من الفنانين والإعلاميين.
اقرأ أيضًا: أبرزهم أمير كرارة وهنيدي.. نجوم الفن يحضرون عزاء أشرف مصيلحي
