الدكتورة صفاء مختار تكتب: «اللي يعيش ياما يشوف»
دي جملة كبرنا وكنا بنسمعها كتير علي كل حاجة يعنى العكس والنقيض، في جمل كتير أوى في حياتنا كبرنا وهى بترن وتزن في ودانا ولما بقي جوانا صوت نجنا وخبراتنا أحنا لقينا في كلام كتير أوى كان ساذج يتقالنا ونسمعه ونصدقه.
يمكن ثقافة زمان وتعليم الكبار للصغار كان بيعتمد بصورة كبيرة عن خداع العقل والأدراك ومكنش مقصود الأستخفاف بعقولنا علي فكره ولكن ده كان نوع من الحماية لينا وقلة وعى بعض الأهالي وخوفهم من أفلام هوليوود في سينما مترو وأوديون ونورماندى وسينما روكسي وغيرها من شباب مخهم وفكرهم غير.
تطور الأحداث وسرعة البديهة في بداية ظهور الموبايلات وبعدها قفزة مكوكية سريعة للسوشيال ميديا وجنان وصل بينا للذكاء الأصطناعى وغيره.
أكتشفنا دلوقتي أننا كنا في عالم الفضاء الخارجي ولما أتفاجئنا بالتطور المبهر في مننا إللى بقي بارع في فن التعامل مع الأشياء وغيره فضل برغبته يكتفي بإنه يادوب يقول ألو ويطلب دليفري لسندوتش وخلاص.
حال الدنيا وتطور الأمر عمره ما يخلينا نحكم بإن زمان أحلى وأجمل.. خالص علي فكره دلوقتي بردوا زمن جديد بس غريب بسرعة تطوره وأحداثه عن إللى فات.
وعلي فكرة مسير إللى يجى حيكون بردوا مختلف.
خلينا نفتكر حلاوة زمان وناس زمان ونعيش حلاوة دلوقتي والناس الحلوة إللى موجودة جمبنا بروحهم وقلوبهم وعقولهم.
سيب كل زمن بذكرياته وخلي الحاضر والمستقبل بكل ما فيهم كل وقت عيشه في وقته وأسعد فيه وأتعلم تطور نفسك ببساطة من غير ماتكون مضغوط أو متضايق.
وعلم زمانك أن السعادة جواك من أمبارح للنهاردة وإن بكره صناعتك بقرارك وستر ربنا إللى ملازم طريقك.
