تعليق ناري لـ نهاد أبو القمصان على مسلسل ”تحت الوصاية”

علقت المحامية الحقوقية نهاد أبو القمصان، عضو المجلس القومي لحقوق المرأة، على ما يناقشة مسلسل «تحت الوصاية»، من قانون وصاية الأبناء في مصر، التي تقوم ببطولته الفنانة منى ذكي، في السباق الرمضاني 2023، قائلة:"الرسول عليه الصلاة والسلام يقول ( أمك ثم أمك ثم أمك ثم أبيك )، لكن قانون الولاية على المال يقول ( أبوك ثم جدك ثم عمك ).

وتابعت أبو القمصان تقول:" طب وأمك ؟ لا لمؤخذه دا مش عندنا، إحنا ما نعرفش من الشرع إلا اللى على مزاجنا".

وقال المحامية الحقوقية، :" أن القانون بيقول بعد الأب الوصاية تروح ( لوصي مختار ) يعنى لو الأب فى حياته عين وصي على ولاده، أما فى حالة عدم وصية الأب فالوصاية للجد، وبعد الجد المحكمة تحكم للأم، إلا فى حالة مطالبة (ذكر) من عصب القاصر، وذلك للحفاظ على ثروة القاصر.
‏
وتسائلت أبو القمصان قائلة:" وهى الأم مش هتعرف تخلي بالها على مال عيالها ؟ المشكلة إن القانون ما يعرفش الأم أصلا، سواء فى حياة الأب أو بعد وفاته، يعنى لو الأب عايش الأم متعرفش تعمل أى مصلحة لأولادها فى حالة غيابه أو سفره أو حتى انشغاله فى شغله، علشان كدا السعودية وكثير من الدول العربية والإسلامية غيرت القانون، ونصت ( رب الأسرة الأب أو الأم )، يعنى سواء الأب عايش أو متوفى، الأب وألام لهم نفس الحقوق ونفس الصلاحيات، احنا بس اللى لسه عايشين فى الكهف.

وتابعت المحامية الحقوقية تقول، :" بعض الناس بتقول ماهى الأم لو اتجوزت ممكن يضحك عليها وتضيع فلوس العيال، دا كلام يتقال لما نبرر سرقة ميراث الستات نقول علشان نحافظ على فلوسهم، ولما نبرر سرقة فلوس الأطفال القصر فنخون أمهم، ولما نبرر سرقة فلوس العيال بعد ما يبلغو سن الرشد فنقول نسلمهم ميراث ازاى ومعندهمش خبرة، فى ألف حجة للسرقة، ستات ايه اللى بيضحك عليها فى زمانا دا".

وأكملت نهاد قائلة:" ثلث البيوت بتعيلها واحدة ست، شقيانة بطولها علشان عيالها، الكلام إن الست يضحك عليها
كلام أهل الكهف اللى عملوا القانون من 57 سنة،
أيام ما كانوا بيجوزوا البنات وهى معهاش اعدادية،
مش فى زمن البيوت ماتعرفش تكمل من غير الستات الشقيانة".