محمد شمروخ يكتب: يسقط الباشا وتعيش الخالة أسما

أنا ليه كنت كاره شخصية الخالة أسما في فيلم "لن أبكي أبدا" بصراحة كانت على حق ضد الباشا المفترى مثال الغطرسة والجبروت ولما انكسر طالب بالرحمة والتسامح.

واحدة ابنها مات من حسرته على الأرض،، كان لازم تعمل إيه يعنى.. بالعكس دى كونها لم تترك ولاد أبو طاقية يقتلوا الباشا بدل حرق المحصول يبقى شخصية محترمة!.

اسما فلاحة أصيلة لا تترك تارها.. بس إحنا علشان نحنحة بت الباشا نسينا حق الفلاحين اللي ياما ألهب الباشا ظهورهم بالكرباج قبل ما ينكسر بسبب جبروته وتسلطه.

هي أرض الناس وكرامتهم سهله كده علشان نهنهة فاتن ولا عماد اللي حشر نفسه علشان خاطر الغندورة.

بس الحق على أبو عوف اللي سمع كلام مرته ونسي أصله واتصالح مع الأعداء وكان يستاهل الكف اللي نزل على صدغه من أسما
لما نسى الذل والهوان من الباشا، وكما قال كامل الشناوي في نشيد الحرية:

"كنت في صمتك مرغم
كنت في صبرك مكره
فتكلم وتألم وتعلم كيف تكره"

والله يرحم أمل دنقل لما قال:
لا تصالح!
ولو منحوك الذهب
أترى حين أفقأ عينيك
ثم أثبت جوهرتين مكانهما..
هل ترى؟
هي أشياء لا تشتري".