محكمة الأسرة اليوم 2020| بعد العاهة المستديمة.. مقص السمك يتسبب في طلاق ”إيمان”
"جوزي غضبه أعمي، مبيشوفش قدامه لما بيتعصب، وهو السبب فى عاهتي"، هكذا قالت زوجة أمام محكمة الأسرة بروض الفرج، مبررة طلب الطلاق للضرر .
وقالت الزوجة "إيمان" أمام محكمة الأسرة بروض الفرج: "جوزي بطبعه حنين، وكريم جدا مش بيرفض ليا ولا لأولاده طلب، بس غضبه أعمي، وبيتعصب على أتفه حاجة، لو البنت شربت فى وسط الأكل يتعصب ويضربها عشان المياه وسط الأكل ممنوعة، بيرعبنا من صوته، لو صوت حد فى الشقة عالي وهو بيتكلم يتعصب ويقوم يضربه، لو الولاد بيلعبوا مع بعض واتخانقوا يضربهم، لو رجع والأكل كان لسه على النار يضربني " .
وتابعت الزوجة فى دعواها أمام محكمة الأسرة بروض الفرج: "مبيشوفش قدامه وهو بيضربنا، أي حاجة تيجي فى إيده يخبطنا بيها، لدرجة إنه مرة كسر الكرسي على نافوخى أنا وعياله عشان بتحايل على الولاد ياكلوا وهما رافضين، ضربه غبي، مبيفكرش في أى عواقب لضربه الغبي فينا، ولما يهدي وأرجع أكلمه يقول معلش ويسكت، مبيرضاش حتى يجبر بخاطرنا".
وأضافت الزوجة أمام محكمة الأسرة بروض الفرج: "آخر مرة كان الأولاد بيلعبوا وصوتهم عالي، زعق فيهم وهما منتبهوش ليه، فقام فضل يضربهم بالحزام، جريت عليهم أحوشهم من تحت إيده، فقام ضربني أنا كمان معاهم، جريت ودخلت المطبخ جري ورايا أنا والعيال، ولقى مقص السمك فى وشه خبطني بيه جه في وشي فتحه، هنا بدأ يهدأ ووداني المستشفي وهناك خيطولي وجهي، وأخدت جرعة علاج فترة عشان آثار الضرب اللي كانت في جسمي خلت الحمي ترتفع عليا".
اقرأ أيضا: محكمة الأسرة اليوم 2020| جوزي أصلع.. وبيحرجني قدام أصحابي
واستطردت الزوجة أمام محكمة الأسرة بروض الفرج: "سيبت المستشفي بعد مافوقت وأخدت تقرير منهم ورحت عملت محضر بقسم شرطة روض الفرج ضد جوزي، وبعدها أخدت ولادي ورحت عند أهلي، ورفعت عليه قضية طلاق للضرر" .
وبناء على ماتقدم للمحكمة من إثباتات تؤكد تعرضها للضرب على يد الزوج، قررت محكمة الأسرة بروض الفرج طلاق الزوجة بعد التأكد من وجود خطر على حياتها وحياة أطفالها، وبعد تعرضها لعاهة مستديمة بسبب ضرب الزوج، مع لزام الزوج بدفع كل الحقوق المنصوصة بعقد الزواج.
