شريف منير يتعرض للسرقة.. ويوجه رسالة لـ”الحرامي” (فيديو)
كشف الفنان شريف منير، عن تعّرض حسابه على موقع تبادل الصور والفيديوهات القصيرة "إنستجرام"، للسرقة، وحرص في فيديو نشره عبر "فيسبوك" مساء اليوم الجمعة، أن يوجه رسالة لـ"الحرامي".
وفي مطلع فيديو يحمل عنوان "رسالة للحرامي"، قال شريف منير ومن ورائه في الخلفية علم مصر: "الكدر كده مظبوط والعلم منور أهو، العلم اللي تاعب الناس، العلم ده هيفضل ملازمني طول الوقت، هيفضل معايا لحد ما اتلف بيه وأنزل بيه القبر، فمتتعبوش نفسكم بيه، تريقة بقى فين العلم، نسيت يا شريف العلم، وهكذا".
اقرأ أيضا| بعد أزمة بناته| شريف منير يكشف سر ظهوره بعلم مصر: حد له شوق في حاجة؟ (صورة)
وأضاف شريف منير: "العلم ده في بيتي، وأقول فيه وأعمل اللي أنا عايزه، إنما بقى فيه حرامية دخلوا البيت ده وسرقوا منه، هو مش البيت ده بالظبط، ولكن دخلوا على صفحتي على إنستجرام وشالوا صورتي وأنا شايل علم مصر اللي تاعبهم وبيتريقوا عليه، شالوا صورتي وأنا شايل التيشيرت وبهني محمد صلاح بعيد ميلاده، شالوا صورة بناتي اللي عملت المشكلة الكبيرة، وبشكر كل الناس اللي دعمتني في الوطن العربي والعالم".
سر تقديم شريف منير بلاغ للنائب العام
تابع: "قليل الأدب هيتجازى، وقلالة الأدب دول من نوع تاني، دول سرقوا صوري من على صفحتي، أو اللي مش عجباهم، اللي هي فيديوهات لتدعيم الجيش المصري، فيديوهات في حب مصر، فيديوهاتي أنا وبناتي وأنا في المطبخ، وصوري أنا وبناتي وبعض صوري اللي كنت فيها لوحدي، شالوا الصور اللي مش عجباهم، وسابولي اللي على مزاجهم، أنا مش على مزاجهم، بوجه بلاغ للنائب العام، ولمباحث الإنترنت، خليكم حواليا، عشان فيه ناس حرامية بتسرقني وفيه ناس بتهاجم الصفحة وبتقول كلام في منتهى السفالة والقذارة، بس أنا مبستسلمش ومبخافش".
واختتم شريف منير: "أنا موجود، والعلم ده هيفضل موجود في أي حتة، اللي مش عاجبه أخرج بره صفحتي، أنا مش لوحدي، أنا داعمني ناس من مصر والوطن العربي ومن العالم كله، الحمد لله على نعمته، أنا مبخافش ومستمر وهفضل على موقفي".
وأثارت أزمة شريف منير ضجة كبيرة خلال الأيام الماضية، بعد نشره صورة لابنتيه "كاميليا وفريدة"، حيث تعرض بعدها لهجوم شديد من الجمهور وتعلقيات سلبية.
ومن جانبه، اتخذ شريف منير رد فعل قوي وتقدم ببلاغ لمباحث الإنترنت، وطالب الجمهور بعدم الصمت واتخاذ موقف قوي حول أي شخص تسبب له ولابنتيه بإهانة على مواقع التواصل الاجتماعي.
