محمد دياب يرد على هجوم شريف منير بعد انتقاده لفيلم ”ريش”
علق المخرج محمد دياب، على تصريحات الفنان شريف منير، بشأن أحداث فيلم "ريش"، الذي اتهمه بالإساءة لسمعة مصر، وذلك في منشور له عبر حسابه الشخصي على موقع التواصل الاجتماعي "فيس بوك".
وتحدث محمد دياب في منشوره قائلا: "كلام الأستاذ شريف منير إن الجوايز اللي خدها فيلم ريش هي مؤامرة من الغرب على مصر كلام خطير جدًا خاصة أنه من فنان كبير".
اقرأ أيضا: فعاليات اليوم السادس من مهرجان الجونة السينمائي
وأردف قائلًا "تكلم من خبرتي كشخص عضو لجنه تحكيم في مهرجان كان، و عضو في أكاديمية الأوسكار: قولاً واحدًا مفيش إنسان لا بالتلميح و لا بالتصريح عمره ما بيحاول يأثر على اختيارات لجان التحكيم، و اللي أعضاءها بيتكونوا من فنانين مميزين من أنحاء العالم.
وتابع: إدارة أي مهرجان دورها بينتهي باختيار الأفلام المشاركة و نقطه.. و يسأل في ذلك الفنانين اللي كانوا أعضاء لجان التحكيم في المهرجانات الثلاثة الكبري زي هند صبري و نيللي كريم و محمد حفظي."
وتابع "دياب": "طب ليه الأفلام اللي بتروح مهرجانات بتبقي عن الفقرا أو عن المشاكل؟ الأفلام المستقلة في العالم كله هي الأفلام اللي خارج منظومة الإنتاج التجارية، يعني الأفلام اللي مش لاقية إنتاج و دي بتبقي دايمًا الأفلام اللي عن المهمشين أو الناس اللي ملهاش صوت، و بما إنها أفلام مش متوقع منها تجيب فلوس فبيبقي عند صناع العمل الجراءة إنهم يعملوا اختيارات فنيه جريئة، و ده بيخليها مغرية للمهرجانات اللي بتدور علي سينما جديدة و مختلفه".
وأضاف المخرج محمد دياب حديثه عن أزمة الفنان شريف منير، قائلًا "سنة 2019 الفيلم اللي كسب البالم دور هو "شوب ليفترز" الياباني ، و سنه 2020 اللي كسب نفس الجايزه هو "باراسيت" الكوري و بعدها اكتسح الاوسكار.. الفيلمين عن العشوائيات في دول عالم أول و بلادهم احتفت بالفيلمين و بصانعيهم بالرغم من أن العشوائيات نسبتها في الدولتين لا تذكر".
كما حرص بتوضيح رأية عن فيلم "ريش" قال: "المميز في فيلم ريش مش الفقر علي الإطلاق بل اسلوب مخرجه الجرئ، و طريقة سرده المختلفة، و سواء عجبك الفيلم أو لأ لازم نشيد بأن الفيلم ده فيلم بصوت و طعم مختلف فنيًا مش موجود في السينما المصرية. الفقر و المشاكل لا يمكن يدخلوك مهرجان كبير لو مفيش جوده صنع أو تجربه سينمائية رائدة، فيلم ريش فيه تجريد للمكان و الزمان، و الفقر فيه خلفيه للقصة لدرجه أن المكان مش شبه مصر و لا أي مكان في العالم".
أوضح قائلًا: "و لو الفنانين نفسهم هم اللي بقوا بيرددوا الاتهامات اللي من نوعيه تشويه مصر فدي مصيبة، لأن الكلام ده فيه مزايدة على الرقابة و علي منتجي الفيلم و على المهرجانات اللي بتختار الأفلام و هيخلي أي فيلم عن المهمشين متهم بالتزلف، و بيصعب أنه ينتج أو يُجاز".
وأكد "دياب" في حديثه، قائلا: "و للأسف الكلام ده بيخلي الرأي الشعبي يبقي دايمًا حاطط أفلام المهرجانات في وضع المتهم: أكيد اختاروا الفيلم عشان سبب غير مستواه الفني.. كلام فيه انسحاق و هزيمة، و كأننا معندناش القدرة نعمل حاجه كويسه".
ونوه محمد دياب، حديثه عن الفنان شريف منير قال: "بمنطق أستاذ شريف كان هينسحب من عرض الفيلم العظيم الكيت كات اللي كان بطله و قدم فيه دور عظيم، و كنا اتحرمنا من أعظم فيلم مصري".
اختتم دياب حديثه مشيدًا بـ مخرج فيلم "ريش"، عمر الزهيري قائلا: "عمر الزهيري مخرج مصري واعد و يستحق مننا كلنا التحية و التشجيع، و فيلم ريش مدحه وذمه لازم يكون في داخل الإطاار الفني فقط".
