عاجل… السيسي:« بنقدم دعم كبير جدا للناس وبنطور.. ومش بنحمل حد تكلفة حاجة»
قال الرئيس عبد الفتاح السيسي: "المفروض ميبقاش فوق أي سقف في جميع المحطات التابعة للسكك الحديد حتة تراب، على أرض المحطة ميبقاش في ورقة مرمية ولا لمبة محروقة ولا نقطة زيت.. إزاي معرفش أنا مالي دي مسؤولية المحطة.. ولازم كل العمال تعمل شغلها على أكمل وجه".
وأضاف الرئيس السيسي خلال كلمته بمؤتمر أسوان: "الناس كانت بتضرب القطر بالطوب علشان مش عاجبهم شكله التعبان.. لازم نطور وننفذ كل التعليمات دي.. أنا بصحى الساعة 5 وهاجي أشوف الحاجات دي بنفسي".
قال الرئيس السيسي، إنه هناك فرق بين الجرار الصالح والقطار كالجديد، "يعني الجرار الصالح ممكن يعطل في أي وقت لكن كالجديد لا ".
ووجه الرئيس السيسي حديثه للمصريين: "ماترضوش علينا كده وعلى بلدكم التدهور والفساد تاني.. وماترضوش بأقل من التطوير والمستوى اللي احنا بنحققه حاليا".
قال الرئيس عبد الفتاح السيسي، " محدش يقول السكة الحديد تعبانة ليه.. الحكومة مش كويسة ومش عارفين يصلحوا.. لا هما عارفين لكن هيصلحوا منين.. المشكلةعندنا في التسعير إحنا بنقدم دعم كبير جدا للناس وبنطور ومش بنحمل حد تكلفة حاجة".
وأضاف الرئيس السيسي خلال كلمته بافتتاح مصنع كيما بأسوان في إطار خطة الدولة لتنمية الصعيد، "البلد كان فيها سكة حديد تعبانة ومواني تعبانة والعلاج عايز فلوس ولما تتوافر الفلوس هنقدر نرجع كل ده جديد تاني".
وتابع الرئيس السيسي: "مش هيبقى في عربية قديمة ولا جرار قديم تاني على السكة الحديد على مستوى الجمهورية في مختلف المحافظات".
واستكمل الرئيس السيسي:"أنا عايز يوم القيامة ربنا يشيلني كل حاجة أنا عملتها.. احنا بنحط أسس لدولة جديدة لتكبر وتنمو كما نأمل".
