الفن

أبرز تصريحات باسم سمرة مع عمرو الليثي: «وفاة بنتي أكتر حاجة وجعتني»

الثلاثاء، 13 سبتمبر 2022 11:05 صـ بتوقيت القاهرة

أثار الفنان باسم سمرة الجدل بعد تصريحاته الأخيرة في أثناء استضافته ببرنامج "واحد من الناس" مع الإعلامي عمرو الليثي، حيث عرض أمس الجزء الثاني من الحلقة عبر شاشة قناة الحياة..

وفي التقرير التالي نرصد لكم أبرز تصريحات باسم سمرة في أثناء الحلقة:

تحدث باسم خلال الحلقة عن العديد من الأشياء الخاصة بعمله في مجال التمثيل، وعند سؤاله عن أكثر الأشياء التي لم يفعلها وندم عليها بعد ذلك، قال: "مقعدتش مع أبويا كتير ودي أكتر حاجة مزعلاني عشان دي كانت فترة شغل وكنت بشتغل كتير، وهو تعب فجأة ومشي، الأب ده حاجة جميلة قوي متفهمهاش إلا لما تفقده".

حديثه عن الوسط الفني ووفاة ابنته

وأضاف أنه لا يشعر بأنه يوجد مؤامرة ضده في الوسط الفني وليس لديه أعداء وأن الجميع يحبه و"لكن الصناعة عمومًا تمر بأزمة كبيرة"، وعن أصعب المواقف التي تعرض لها، قال: "لحطة وفاة بنتي أكتر حاجة وجعتني ودفنتها بإيدي، واستحضرت الإحساس ده في مشهدي في (منعطف خطر) لما كنت بدفن بنتي".

وعن ما يضايقه في نفسه، قال: "بدخن كتير وبتضايق من نفسي قوى في الموضوع ده، وثقتي في نفسي بتضايقني وعملالي مشاكل، ومصدر أماني حب الناس ليا والفلوس وبخاف من المرض".

باسم سمرة يفجر مفاجآت عن أعماله المقبلة

تحدث الفنان باسم سمرة عن أعماله المقبلة في رمضان، وصرح أنه يقوم ببطولة مسلسل "بابا المجال" أمام الفنان مصطفى شعبان، وأيضًا هناك عمل آخر يجمعه بالفنان محمد فراج في "بطن الحوت".

باسم سمرة يتحدث عن شائعة وفاته

وتطرق باسم في الحديث عن شائعة وفاته في الفترة الأخيرة، وقال: "مش عارف إيه الحكاية دي ودي مش أول مرة بس أنا عايش أهو الحمد لله.. السوشيال ميديا دي سيئة جدًا وعلاقتي بيها صفر، ومبخافش من الموت ومش هكتب وصيتي قبل ما أموت".

وأضاف: "لو مكنتش ممثل كنت هكون طباخ وكل عيلتي طباخين، الأكلة الحلوة زي الدور الحلو لما تعمله ويعجب الناس وأنا بطبخ كويس جدًا وبعمل مندي ومحاشي وكل حاجة".

حديثه عن الفنان محمد رمضان

وعند سؤاله عن إمكانية موافقته على القيام بدور أمامه، أكد: "طبعًا، محمد حبيبي وكان في دور في رمضان اللي قبل اللي فات بس محصلش نصيب، وأول مرة يظهر كان معايا في (هالة والمستخبي) كان عامل أخويا مع الفنانة ليلى علوي ست الكل والفنانة رجاء حسين، وأتحداه في أي حاجة ولما كان بيقول نمبر وان قولتله تعالى نعمل مشهد كده 10 دقايق ونشوف مين نمبر وان، وجالي البيت وأنا رحتله المكتب وهو راجل لطيف".

وتابع: "محمد طيب جدًا وخير بس كل واحد بيشوف الطريقة اللي تناسبه للدعاية بتاعته وطريقة محمد زي طريقة بتوع البوكس بتوع أمريكا لما بيقعدوا يعدوا الفلوس، ممكن الطريقة دي تكون مستفزة بس عملاله مشاهدات وهو ناجح ومش محتاج نصيحة وبتمناله التوفيق ومستني أشوفه في عمل قوي يرد بيه على كل اللي بيتقال".

دور البلطجي

وتطرق بالحديث إلى حصر المخرجين له في أدوار البلطجة، قائلًا: "رفضت، ولو شايفين إني متأخر لا أنا برفض وأصعب حاجة في الشغل ده إنك ترفض عشان الفلوس والنجومية وأنا مش عايز أتحط في الحتة دي، ممكن يجيلي دور بفلوس كتير بس أشوف دور تاني بفلوس أقل لكن مختلف".