طبيب لزملائه: «بلاش تاخدوا إعادة كشف من المرضى الناس بتدعى عليكم »
تداول رواد مواقع التواصل الاجتماعي منشور لأحد الأطباء ويدعى الدكتور تامر الدسوقي والذي طالب فيه الأطباء بعدم أخد فلوس في الزيارة الثانية للمريض (إعادة الكشف).
وقال الطبيب تامر الدسوقي في منشوره: "زملائي الأعزاء (أسنان وبشري) من غير زعل احنا ليه بناخد فلوس من المريض لما بييجي يعيد كشف؟ حضرتك حددت قيمة الكشف والمريض دفعه وفي الإعادة إما المريض خف وشفاه الله علي إيدك يبقي شكرا وكتر خيرك وتحمد ربنا، طب لسه تعبان الحالة بتاعتك تاخد فلوس تاني ليه؟.
وأضاف "الدسوقي"، " صدقوني المريض بيدعي علينا وهو خارج، حضرتك أنت حددت قيمة الكشف اللي يناسبك، والمفروض حضرتك تتابع مع المريض لغاية لما يتحسن، لكن يجي يعيد الكشف تدفعه فلوس تاني، مش كفاية العلاج غالي".
وتابع الدكتور تامر الدسوقي،:" ياريت نراجع نفسنا المرة الأولي ليك والمرة التانية لله وزكاة عن صحتك أنت وأسرتك وربنا هوة اللي بيبارك، أرجوكم متزعلوش مني بس أنا بنقل شكاوى الناس".
واختتم،" أنا من يوم ما فتحت العيادة مش بأخذ إعادة كشف حتى لو المريض جه العيادة أكتر من مرة."
اقرأ أيضا: وزير الخارجية: «مصر تدعم بكين في خطتها التنموية»
تفاعل المتابعين مع المنشور
وتفاعل عدد من المتابعين مع المنشور وجاءت التفاعلات كما يلي:
أسامة أمام علق قائلًا:
"هو ده النظام اللي كان متبع ليك كشف وليك استشارة إنما ده نظام مستحدث للاستغلال وحسبنا الله ونعم الوكيل في كل مستغل قلبه مش على الغلابة".
وعلق حساب آخر قائلًا:
"هذه حقيقة يعاني منها الكثير من الفقراء، ودليل كبير على أن مهنة الطب تحولت إلى تجارة وجشع على حساب المريض الفقير".
وتفاعلت ملك الديب:
"ربنا يكثر من أمثالك.ويبارك فيك ..يا ريت كل دكتور يكون عنده إنسانية حتى ولو شوية .ويحس بالناس".
اقرأ أيضًا: التعليم تصدر بيانا بشأن الامتحانات الإلكترونية للطلبة المقيمين في الخارج
بينما يوسف البوهي علق قائلًا:
"اكثر الله من امثالك وبارك فيك ورزقك من حلال وأطال ف عمرك وجعلك قدوه لمن يتقيه ويخافه ويخشاه".
وقال محمود منسي:
"ربنا يسعدك ويحفظك ويبارك فيك وفي أولادك وأهل بيتك أجمعين يارب العالمين وجزاك الله خيرا كثيرآ وبارك فيك".
