«بعد دعم أحمد حلمي لها».. سلسبيل حسين: نفسي أرسم شوارع مصر كلها بالألوان

أثارت الفتاة المصرية سلسبيل حسين البالغة من العمر 18 عام، إعجاب متابعي مواقع التواصل الإجتماعي بعد تصدرها التريند لمدة 3 أيام على رسمة بعنوان "ماذا رأيت".

من هي سلسبيل حسين

تقول سلسبيل في تصريح خاص لـ "الطريق": "أنا سلسبيل حسين عندي 18 سنة من محافظة الجيزة، وبدرس نظم ومعلومات، وحصلت على مركز ثالث جمهوريه في مسابقة إبداع على مستوى جامعات ومعاهد مصر، وأيضًا مركز ثالث من قصر الثقافة والفنون، ومركز اول على محافظة الجيزة".

بداية الرسم

وتروي: "بدأت رسم وأنا عمري 6 سنين، واتجهت ليه بدافع حب القصص اللي ماما كانت بتحكيلي عنها وأنا صغيرة، كنت في البداية "بشف" الرسمة، وكانت بتطلع كوميديا أوي، لكن بعد كده زاد حماسي وبقيت أرسم أنا".

وتابعت: "وأنا في 2 إعدادي عرفت أبلكيشن بالصدفة اسمه sketch book، متاح عليه كل الألوان والفرش ووقتها مكنتش أعرف أن النوع دا اسمة ديجيتال آرت".

الفنان أحمد حلمي دعمني

وأضافت: "أول رسمة ليا كانت سبونج بوب، وبعدها رسمت الفنان أحمد حلمي، ونزلتها على الإنستجرام، مكنتش متخيله أنه ممكن يشاركها على صفحته ويشجعني، ومن هنا خدت أول دعم ليا ولطموحي، بالإضافة لكثير من الفنانين دعموني ونزلوا صورتهم اللي رسمتها على صفحتهم منهم الفنانة اسعاد يونس، وسوسن بدر، ومنى الشاذلي، والفنان أحمد أمين، ومحمد رمضان".

قصة رسمة ماذا رأيت

وقالت: "أنا كنت بشوف حملات كتير للعنف ضد المرأة، وفضلت أشخبط لحد ما طلعت معايا كده ونزلتها عادي، وأنا برسمها حبيت أرسم وش بس، ويوم ما نزلتها على السوشيال طلعت تريند وناس كتير نزلتها، و بسبب كدة طلعت تريند على تويتر برسمة ماذا رأيت".

بشكر ماما على دعمها ليا

واختتمت: "أتمنى كل الناس تحب الرسم وأعمل أكاديمية باسمي، وننزل في يوم نرسم كل الشوارع في مصر، ونزينها بالفرح والسعادة، وبشكر ماما وكل اللي دعموني ووقفوا جنبي".