«لبس مشهد خناقة كارم فكرتي وفيلم هارلي هيكون أعلى إيراد في مسيرتي».. أبرز تصريحات محمد رمضان في «الراديو بيضحك»

حل الفنان محمد رمضان ضيفًا في برنامج "الراديو بيضحك" على راديو 9090 تقديم الإعلامية فاطمة مصطفى، وكشف رمضان خلال الحلقة عن العديد من كواليس تصوير مسلسل "جعفر العمدة" وعن رأيه في جميع الأبطال، إلى جانب حديثه عن فيلمه الجديد هارلي.

وفي التقرير التالي نرصد لكم أبرز تصريحات محمد رمضان خلال برنامج الراديو بيضحك:

- أول ما قرأت المسلسل كنت حابب أقدم شخصية زى جعفر العمدة، لأنه معتز بأصوله وتقاليده ولكنه متحضر.

- المسلسل لا يشبه عائلة الحاج متولي لأنه لا يدور فقط حول الأربع زوجات.

- تقليب الشاي بضرب المعلقة فكرة محمد سامي، وتوافقت مع رؤيتي للشخصية لإنه شخص سريع.

- مي كساب رفيقة رحلتي، ومتفاجئتش بيها لأنها كانت مستنية الفرصة اللي تفجر موهبتها.

- إيمان العاصي فاجئتني، لإنها كانت دايمًا بتقدم دور البنت الحلوة بس.

- منة فضالي مفاجئة بالنسبالي، واكتشفت إنها كوميديانة جميلة ومتمكنة بشكل يخض.

- كلمة يا ليفة طلعت في مشهد وبقت لازمة للشخصية، وعملت مشاكل لسامي عشان بقا بيقولها في العادي.

- محمد سامي اختار كل الأبطال برؤية صائبة، ورأيي كان استشاري فقط.

- هالة صدقي صديقتي وأخف دم في الدنيا ومتصالحة مع نفسها والتاريخ يتكلم عنها.

- أحمد فهيم فنان كبير وبيكتب شعر، وخاله الفنان خالد صالح فالعائلة كلها التمثيل في دمها.

- عصام السقا فاجئني ودوره صعب جدًا، وأعرفه من زمان لكن مكنتش أعرف إنه حابب التمثيل وهو محترف.

- زينة إضافة كبيرة للمسلسل ودورها السهل الممتنع، وهى بتتعامل مع السوشيال ميديا بحذر.

- منذر رياحنة كان عنده اختبار كبير في اللكنة، وهو صديقي ورفيق رحلتي من زمان.

- أحمد داش صاحبي جدًا، واتفاجئت وأنا بتفرج إنه واخد شوية تفاصيل من جعفر العمدة.

- لبس مشهد الخناقة مع كارم كان اقتراحي ومحمد سامي شجعه جدًا، والمشاهد دي بتدي مصداقية أكثر.

- مشهد دخول الزوجة الرابعة اتعاد 3 مرات من الضحك، واتزحلقت وأنا بضرب منة فضالي.

- الناس هتتبسط جدًا في نهاية المسلسل، وإن شاء الله ترضي الجمهور وتليق بالمسلسل.

- في الدراما لو 200 مليون واحد شاف المسلسل يبقى منجحش، لكن في السينما لو مليون شافوه يبقى نجح.

- جمهور السينما الحقيقيين من سن 12 سنة إلى 28 سنة، وفيلم هارلي بيخاطب هذه الفئة.

- الدراما بكون ضيف في بيتك لازم أكون حريص في كل حاجة، لكن السينما بيتي لازم الناس تشوفني مختلف.

- مستحيل أقدم شخصية هارلي في الدراما، وبتنبأ إنه هيكون أعلى إيرادات في مسيرتي.

- مى عمر إضافة لفيلم هارلي ولما اترشحت وافقت، لكن تفاصيل أعمالها التانية مليش علاقة بيها.

- بحضر لمسلسل 8 حلقات على منصة عربية، ومن إخراج محمد سامي وإنتاج شركة ميديا هب.