في العاصمة الخرطوم الشوارع ثكنات عسكرية..
طالب مصري يستغيث لـ”الطريق”: «احنا بنموت كل لحظة رجعونا مصر»
في ظل متابعة تطورات الأوضاع على الساحة السودانية من نزاعات داخلية، تتابع أيضًا الدولة المصرية أوضاع الطلاب المصريين في السودان وتحديدًا العاصمة التي تعد منطقة النزاعات الكبري، وبالتالي هناك العديد من الاستغاثات من قبل بعض الطلاب من عدم توفير الإمكانيات لديهم من أكل وشرب، لاسيما الأدوية والكهرباء.
الأوضاع في "الخرطوم" غاية الصعوبة
روي أحمد محمود سيد عيد، طالب بالطب البشري الفرقة الثالثة، جامعة قاردن سيتي السودانية والتي تقع في حي بري بالعاصمة الخرطوم لـ "الطريق" تفاصيل الأوضاع التي يعيشها الطلاب المصريين منذ اندلع الأزمة، وحتي الآن، قائلًا: الأوضاع في غاية الصعوبة وجميع الطلاب جالسين في المنازل خوفًا من الأحداث أحنا حرفيًا بنموت كل لحظة ياريت ترجعونا مصر".
نقص في الأكل والهواتف فصلت
تابع "الطالب المصري في السودان" في تصريح خاص، قائلاً: "في طلاب مش عارفين نتواصل معهم بسبب فصل الهواتف الخلوية، والسبب الرئيسي قطع الكهرباء، وبعض الطلاب مفيش عندهم ولا أكل ولا شرب ولا أدوية ومش عارفين نتواصل معهم، ومحبوسين في البيت ميقدروش ينزلوا، حتي المحلات مغلقة ودي أزمة تانية".
الشوارع ثكنات عسكرية
أضاف قائلًا: "جميع الشوارع تحولت لثكنات عسكرية مدمرة بشكل كامل ونهائي، ده غير أن ضرب النار شغال من جميع النواحي مفيش مفر غير أننا نستخبي في البيوت، كل ده جانب الخوف والتوتر اللي إحنا عايشين في ليل ونهار، وغير الخوف وقلق اللي أهلينا في مصر عايشيين فيه، والحقيقة أن الوضع صعب للغاية ونطالب بأقصى سرعة الجهات تتدخل وننزل مصر في أقرب فرص.
صوت الطيران والمدافع
لفت قائلاً: "إحنا عايشين حالة من الخوف لما بنسمع صوت الطيران من فوقك، بجانب المدافع والرشاشات من حولينا الطلقات أحيانًا بتخترق البيوت، يعني بالمختصر الوضع في العاصمة مخيف وموتر جدًا يا ياريت يكون فيها استجابة سريعة لمطلب الرجوع".
المطالب الأولوية
سرد "الطالب المصري" المطالب الأولوية والأولي بالاستجابة قائلًا: "حضرتك مطالبنا قليله وبسيطة، دي كل مطالبنا حاليًا ياريت فعلا تساعدونا"
1- يوفروا أكل وشرب للناس المحبوسة ومعندهاش اصلاً فطار.
2-ننزل الطلبة اللي هناك مصر لأن الوضع خطر وصعب فعلا.
3-نحول للجامعات اللي في مصر زي أوكرانيا لأن فعلا حتى لو الوضع هدي تاني البلد هتكون مش داعمة وحتى التعليم هيحتاج وقت عشان تعدي الأزمة دي وبالتالي مستقبلنا هيضيع.
