محمد شمروخ يكتب أنا وعمر الشريف والبودينج

في فيلم بداية ونهاية لما رجع عمر الشريف في أول أجازة من الكلية الحربية، راح يحكى لهم عن حاجة شافها مع زمايله هناك اسمها "بودينح" وكان مبهور بيها.
وأنا يت حبيبي من يوم ما شفت الفيلم وأنا أتجاهل إحساس بنوع من الضيق من جهلى بالبودينج خاصة إن الفيلم إنتاج سنة ١٩٦٠ وأحداثه جرت في منتصف الثلاثينيات تقريباً وكان واضح إن الأخ بودينح ده حاحة حلوة قوى.
طيب أسأل مين عن البودينج ده؟!.
خاصة إنى عمرى ما صادفته في محل حلويات وممكن لو سألت عليه يطلع حاحة بطلت ويبقى شكلى يكسف.. احنا ما صدقنا عرفنا الدونتس من كام سنة واسمه يحسسك إنك ماشي في جاردن سيتي!.
بس كان فيه إعلان في التمانينات عن بودينح دكتور أوكتور بس من غير البت بتاعة الإعلان ما تقول إيه هو بالضبط!.
طبعاً محدش هيصدق إنى اتصدمت فيه لما عرفته ومحدش يسألني عرفته إمتى بالضبط.. بس صدمتى فيه مش نفس صدمتى في الكيوي زمان لكن الصدمة إن البودينج طلع حاجة كده ممكن تقول عليها "مهلبية كاكاو باللبن" اللى أعرفها عز المعرفة!.
يا راجل مش تقول كده من زمان.. أتارينا طلعنا قرايب وكمان عشرة قديمة وأنا مش عارف!.
بس والنعمة من يوم ما سمعت اسمه من عمر الشريف أول مرة وأنا عايز أسأل وما كنتش أعرف أنه هو حبيبي بتاع زمان.. ياااااه.. الدنيا صغيرة يا جدعان!.