ماجد الكدواني عن صداقته بـ كريم عبد العزيز: ”لو ضربني بالجزمة هسامحه”
كشف الفنان ماجد الكدواني عن تفاصيل علاقته المميزة بصديقه النجم كريم عبد العزيز والسر وراء تعلقهما ببعض على مدار السنوات الماضية.
وقال الفنان ماجد الكدواني خلال لقائه مع الإعلامي عمرو أديب والمطربة أصالة في «بودكاست BIGTIME»: كريم عبد العزيز ده حبيبي، اللي بيعجبني فيه الأمانة والمصداقية اللي من القلب للقلب وساعات نقعد أنا وهو نتكلم مع بعض ويقول لي يا أخي مش فاهم الناس بقت عاملة كده ليه؟ هو إحنا شكلنا غريب قدام الناس ليه، هو حاجة غريبة اتنين بيحبوا بعض لله في الله".
وأضاف ماجد الكدواني: "ساعات بنقعد نتكلم في التليفون 8 ساعات، وساعات بنبقى فعلا محتاجين نتكلم مع بعض وجعانين مصداقية ونتكلم براحتنا، دون رقابة وقدامك كتاب صاف".
وتابع ماجد الكدواني: "سر علاقتي بكريم عبد العزيز، إننا بنحب بعض بجد ونغلط ونتعاتب محدش هيمسك على حد حاجة، أنا وهو بنتكلم في الحياة بعيد عن المهنة خالص، صداقتنا عمرها 24 سنة ومستمرين بدون خناق، هو إنسان جميل وقلبه صافي ودايما يقولي احنا مصروفين لبعض ومراتي تقولي ربنا يبعد عنكم العين".
وأكد ماجد الكدواني: "كريم عبد العزيز ده لو في يوم اتنرفز وزعل وقلع الجزمة وضربني بيها هسامحه علشان ميبقاش حسد، وشهادة قدام ربنا لو عمل فيا إيه مش هزعل منه".
اقرأ أيضا: ماجد الكدواني يكشف لـ«الطريق» سبب تقديم جزء ثان من «موضوع عائلي»
