ما عدتش مالي مكانك عندي!
ماعدتش مالي مكانك عندي
ورجعت أدوَّر لي على صديق
أنا كنت بشوفك بالدنيا
وبقول أنا عمري ما
أعدّي لوحدي طريق
أتاريك جاي
تأكد لي على رسالة
مفادها إنى لوحدي
القادرة على تحقيق أحلامي
وإن وجودك انت وغيرك
كله سبب وخيوط قدامي
وإن العين الشايفة النور
منبعها النور
بتصبّ النور ع الخلق مطر
فينبتوا للحب شجر
للفرحة شجر
للطيبة وللحنّية غيطان
وعيون أطفال
يجروا ويلعبوا حواليها
وفي عز الليل حواديت وقمر
بيطل يرد الخير
يحضن في الأرض
طب ليه بدور لي على صديق؟
-علشان السكة تقيلة
والخطوة الشايلة الحمل
جرّتها عليلة
وأنا جنبي صديق
بضحك أكتر
بفرح وأتطمِّن وبفكر
وأكتب في قصايد وأتطوّر
شكرًا ع الوقت الفايت بينا
شكرا على سندك
وحنان الأب بدون تعليق
شكرا ع الورد وع البلالين
شكرا على صوري اللي حفظتها
على كل هدية بقلب بريء
شكرا لسلامة نواياك يمي
أنا كنت جناحك وقت وقوعك
طيَّرتك على سماواتي
وفرق كبير بين يوم ما عرفتك للآن
أنا يومها عرفتك قلقان
متوتر خايف ندمان
شكرًا للقدرة خلّتني أسيبك في أمان
وقدرت أسيب فيك بصمات
مش ممكن يمحيها زمان
الوقت الجاي ..
حضَّر شُنَطك للمستقبل
طمِّن قلبك زي ما كنت بطمنهولك
الزم وِردك هو الباقي في كل كتاب
اعرف وقتك واعرف حالك
واوعاك تتغرّ
لو وردات اترمّوا عليك
خلي عنيك جوا ف قلبك
ماتحطش قلبك في عنيك
اقرأ أيضًا: الأعلى للثقافة يصدر ديوان «مفيش دوا للعاشقين»
