محكمة الأسرة اليوم 2020| جبروت امرأة.. عاطف: مراتي بتضربني بالحزام

دائما السيدات هن الطرف الضعيف، المشتكي دائما بمحاكم الأسرة، وغالبا تشكو السيدة من عنف زوجها وضربه لها أو ضرب أهله لها، إلا أن الغريب هو وجود رجل بمحكمة الأسرة يشكو من العنف الأسري.

اقرأ أيضا: أجهزة الأمن تبحث عن المتهم بقتل مسن في القليوبية

"مراتي مفترية.. ضربتني بالحزام.. مش عاوزها مش عاوز أعيش معاها" هكذا برر الزوج "عاطف" دعواه لطلاق زوجته أمام محكمة الأسرة بشبرا الخيمة.

وقال الزوج فى دعواه أمام محكمة الأسرة بشبرا الخيمة: "اتجوزنا من سنة واحدة، كنت عارف إنها شخصية قوية، بس مكنتش عارف إنها جبروت، كانت بتتحكم فى كل حاجة أكل وشرب وخروج، كانت وظيفتي أشتغل وأجيب فلوس تصرف وبس".

وتابع الزوج فى دعواه أمام محكمة الأسرة بشبرا الخيمة: "كنت راضي بعيشتي معاها وقولت ست مفترية، بس طيبة، هي فعلا كانت فى الأول غلبانة، بس مش عارف حصلها إيه، اتحولت لشيطانة، كل مايحصل حاجة تفضل تهيني، وتشتمني، وأحيانا بتطردني من البيت".

وواصل الزوج فى دعواه أمام محكمة الأسرة بشبرا الخيمة: "الأمور بدأت تتطور مرة عن مرة، والإهانة قدام الجيران والقرايب، وأهلي كل واحد فيهم بيبصلي وكأنه بيقولي استرجل، مبقتش عارف اعمل إيه معاها، ولو اتكلمت فهي غلطتي من البداية".

وأكمل الزوج فى دعواه أمام محكمة الأسرة بشبرا الخيمة:  وفى يوم، متوقعتش اللي هتعمله، لمجرد سبب تافه بسيط، وقعت كوباية الشاي واتكسرت، قمت بسرعة قبل ماتفتح صوتها عليا، أشيل الإزاز وأمسح مكانها، بس للأسف كنت إتأخرت، سمعت الصوت وخرجت بزعيقها العالي، وكأن غضب ربنا نزل عليها وعنيها احمرت وسألت مين عمل كده".

وأضاف الزوج فى دعواه أمام محكمة الأسرة بشبرا الخيمة: "قولتلها وأنا كلي خوف إن مكنش قصدي ووقعت غصب عني، مسمعتش مني ودخلت جابت الحبل وهجمت عليا قعدت فوقي، ونزلت فيا ضرب، وبعدها كتفتني ونزلت ضرب وعض بالحزام فيا حسيت إني من المفاجأة مشلول مش عارف أعمل حاجة، ولما فكتني قولتلها إنتي طالق، فضحكت عليا وقالتلي مش بمزاجك تطلقني، فقررت أتوجه لمحكمة الأسرة وأطلقها رسمي".