”إنسان قبل ما يكون فنان”.. عمر كمال يروي موقف له مع تامر حسني
أعرب المطرب الشعبي عمر كمال عن حبه الشديد للفنان تامر حسني وكشف عن موقف حدث بينهما من خلال مجموعة من الصور، حيث نشر عمر كمال مجموعة من الصور له مع تامر حسني عبر صفحته الرسمية بموقع التواصل الاجتماعي "فيسبوك" وعلق عليها: "أنا بحب الإنسان ده جدًا".
وأضاف: "من حوالي ٤ سنين كان عندي حفلة في العين السخنة في قرية سياحية كان في نفس اليوم الفنان تامر حسني عامل حفلة فيها.. والقرية بلغتني إن فقرتي قبل تامر وهطلع أعمل الفقرة على نفس المسرح.. قولتلهم أستحالة ده يحصل لإن المنظم مش هيرضى عشان أنا مش نجم ومش معروف ومحدش هيرضي يديني الفرصة ديه".
موقف تامر حسني مع عمر كمال
وتابع كلامه: "قالولي إحنا أصحاب الحفلة والقرار.. قولتلهم يعني أعمل دعاية وأنا مطمن قالولي أعمل وأنا من جوايا متأكد وعارف إن محدش هيطلعني على المسرح ده.. عملت دعاية وناس كتير من بلدي السويس قطعت تذكرة عشاني وطلعت كام ميكروباص صحابي عشان يشجعوني وعملت كل اللي أقدر عليه".
وأضاف عمر كمال: "روحت يوم الحفلة لقيت الحفلة الساعة ٤ العصر على حمام السباحة ومفيش ولا مخلوق أصلاً والدنيا حر جدًا وحفلة تامر الساعة ١١ بليل في مكان تاني خالص من القرية.. حتى مغنتش من كتر ما كان مفيش ولا فرد.. الناس كلها نايمة يا إما محدش جه عشان لسه بدري على حفلة تامر".
وقال أيضًا: "بقى شكلي وحش جدًا قدام الناس هطلع كداب وعملت دعاية بالكدب وأنا مليش ذنب.. كلمت طوب الأرض عشان أوصل لتامر وقتها معرفتش محدش خدمني ومحدش رضي يساعدني.. كنت أنا وصاحبى اسمه محمد سمير كان مؤمن بيا جدًا.. روحت مكان حفلة تامر قعدت تحت المسرح من الساعة ٤ لحد الساعة ١١ قسمًا بالله حوالي ٦ أو ٧ ساعات عشان أضمن أبقى جنب المسرح لأني لو روحت بليل محدش هيرضي يدخلني".
غناء عمر كمال مع تامر حسني
وفاجئ عمر كمال جمهوره في كلامه قائلًا: "وأنا قسمًا بالله ما معايا حتى حق دخول الحفلة وكان قابض من القرية ٦٠٠ ج !! قعدت تحت المسرح بحيث أقدر أكلم أى حد وأطلعله أغني معاه حتى عشان منظري قدام الناس يبقى حلو.. ٧ ساعات لحد ما النهار راح والليل جه والحفلة اشتغلت وطلعت طبعًا.. كان جمب المسرح جاردات ومنظمين و كله ملخوم في الحفلة وتامر".
اقرأ أيضًا: عمرو مصطفى يعلن عن مبادرة جديدة بطرحه أغنية كل أسبوع
وأوضح: "كلمت منظم الحفلة مرضيش يطلعني وقالي استنى للأخر.. كلمت أصحاب الحفلة محدش طلعني.. اتصلت بكل فنان ممكن يكون يعرف تامر محدش ساعدني.. شكلي كان هيبقى وحش جدًا قدام الناس إني مغنتش وابن بلدهم محدش حتى شافه عدى من قدام المسرح".
واختتم كلامه: "كلمت شخص محترم جدًا اسمه حازم شغال مع تامر حسني وحكيتله.. الراجل راح قال تامر.. راح قاله هاتهولي بسرعة.. وجبر بخاطري وقدمني للناس وغنيت جمبه واتصورت.. وروحت رفعت الصور إني كنت في الحفلة وغنيت.. يمكن هو مش فاكر الموقف ده حتى بس أنا فاكرهوله إنه كان إنسان قبل ما يكون فنان وروحت طاير من الفرحة ونمت في بيتي مبسوط وليه موقف تاني هحكيه في وقت تاني".
