ريهام سعيد: عملت خير في كل الحيوانات وفيه راقصات وممثلات ضدي (فيديو)

حرصت الإعلامية ريهام سعيد، على الرد على جمهورها بشأن حلقتها أمس الأربعاء في برنامجها "صبايا الخير"، عن "صيد الحيوانات"، والتي أثارت ضجة كبيرة بسببها وسط مطالبات بوقف برنامجها، واتهامها بالعنف مع الحيوانات.

وقالت ريهام سعيد في فيديو لها عبر حسابها الخاص بموقع التواصل الاجتماعي "فيسبوك"، "فوجئت الصبح بالضجة اللي حصلت بسبب حلقة أمس، ومعظم اللي بيتكلم ماتفرجش على الحلقة، يعني مش معقولة الساعة 4 ونص الصبح، يطلع هاشتاجات ضد ريهام سعيد، امتى الحلقة لحقت اتشافت واتعرضت علشان يطلع الحاجات دي".

وأضافت: "بعتذر لو في حاجة أزعجتكوا بس احنا هدفنا نركز على مهنة صيد الحيونات وأنها بستخدم في مراكز الجامعات والبحوث لأنهم بياخدوا منها أجسام مضادة وهي دي الطريقة اللي بيصطادوا بيها، وواضح إني كنت خايفة ودورت وشي لإني مكنتش قادرة اشوفهم وهما بيمسكوا رجله، وسألت على الطريقة الصحيحة اللي بيتشال منها قالولي زي القطة".

وواصلت: "في ناس طبعا مضايقة إن الثعلب بيتم صيده بالطريقة دي، بس أنا مبسوطة إن البرنامج سلط الضوء على إن الصيادين دول بيصطادوا بطريقة مش فيها رحمة، بس أنا مبسوطة بالرغم من العواقب، إن البرنامج سلط الضوء، على قضية الإعلام لم يتطرق لها من قبل، والبرنامج مسجل، يعني كنت ممكن أمنتج اللقطات بتاعت الثعلب ويطلع في الآخر بس، ولكن أنا معملتش كده علشان طول عمر البرنامج ده حقيقة، وبقدم الحاجة زي ما هي".

وأضافت: "هي دي طريقة الصيادين، بتهاجموني أنا ليه، أصل أنا مش هعدل عليهم، ولا أنا أعرف الثعلب بيتمسك إزاي، ومستغربة إن مفيش حد جاب سيرة الصيادين والصيد خالص، وبتحسبوني على طريقة صيد من نصف قرن محدش خد باله منها إلا عن طريقي، رجاء ماتتبعوش الناس اللي عاوزة توقف البرنامج لأغراض شخصية".

اقرأ أيضًا: سمراء النيل وأجمل نساء العالم.. أسرار في حياة مديحة يسري وقصة زواجها من محمد فوزي

وتابعت: "احنا مش محتاجين نعمل حاجة علشان المشاهدة احنا جيبنا مشاهدات عالية جدا، بس في ناس يخصها ريهام سعيد بس، مش هاممها الثعلب ومش كل مرة اتظلم كده، وفي ناس ضدي وأعداء، وناس مضايقين إني طلعت بالبرنامج تاني، منهم ممثلات وراقصات والبرنامج ده هادف، وطول عمره شريف، وحتى الحلقة دي مهمة جدا، على الأقل لو هتبقى السبب في تغيير الطريقة بتاعت الصيادين في صيد الحيوانات، يبقى أنا عملت خير في كل الحيوانات".

كما نشرت ريهام سعيد عدة صور لنجلها مع الحيوانات عبر حسابها بموقع "فيسبوك"، وكتبت عليها: "طول عمرنا الحيوانات جزء من حياتنا أنا وعيلتي".