حنان سليمان لـ”الطريق” عن انتقاد تمثال محمد صبحي: لو محترمناش الكبير نبقى مش مظبوطين

أعربت الفنانة حنان سليمان عن استيائها الشديد، من انتقاد البعض لإهداء الفنان الكبير محمد صبحي النجوم الذين كرمهم احتفالًا بمرو 50 سنة على مسيرته، تمثالًا يحمل اسمه وصورته، مشيرة إلى أنها مقدرة وممتنة لـ تكريمها، رغم أنها لم تحضر التكريم لظروف خاصة بالتصوير.

وقالت حنان سليمان: "والله أنا مش بحب اللي بيدوروا على مدخل للانتقاد وزي ما بيقولوا "حبيبك يبلعلك الزلط"، مش ممكن كل حاجة حلوة ندور على مدخل علشان ننتقد فيها، ده تقدير من فنان أستاذ قدر كل الناس اللي اشتغلوا معاه من القامات الكبيرة والأساتذة إلى العمال، ده أستاذ، عيب ما يقال ومايصحش".

وأضافت حنان سليمان في تصريح خاص لـ"الطريق": "ما فعله محمد صبحي لافتة كبيرة من أستاذ كبير بنشكره عليها وبنشكره لوجوده وسطنا، أنا حزينة على الناس اللي بيدورا على أي شيء لانتقاده، إحنا في حاجة لأن نتكاتف والصناعة في خطر عيب أوي".

وأشارت حنان سليمان إلى أنها لم تذهب للتكريم لظروف خاصة بالتصوير، معبرة عن امتنانها لمحمد صبحي وتقديرها من قبله رغم أنها لم تشارك معه سوى في عملًا واحدًا ليس من إنتاجه بل من إنتاج جلال الشرقاوي.

وواصلت حنان سليمان حديثها موضحة أن محمد صبحي تذكر جميع من عملوا معه حتى زميل يدعى زين نصار رغم أنه ابتعد عن الفن منذ فترة، مضيفة: "عيب مايصحش لازم نبص للجانب المشرق قبل ما ندور على مأخذ وكتر ألف خيره وده فعل مايخرجش غير من كبير وأستاذ".

اقرأ أيضًا: خاص | لبلبة عن انتقاد محمد صبحي بسبب التمثال: هو في أروع من كدة

واستكملت: "التمثال عليه صورته، لإن هو اللي بيكرمنا وقال الناس دي هما أسباب وجودي في المكان ده فهو بيدي التكريم باسمه، ده مش وقته يكفي ما إحنا فيه المفروض أي لمحة وأي تصرف من كبار نقدره ونجله ونحترمه دول كبارنا لو محترمانش الكبير نبقى مش مظبوطين وفينا حاجة غلط".