مقال| بداية الطريق لمعرفة الله ومراده
العلاقات الإنسانية أساس تعاملنا مع كل شيء في الحياة، بداية من تعاملنا مع نفسنا.
ومهم قوي الإنسان يفهم نفسه حق الفهم والمعرفة ويعي خباياها ونقاط ضعفها وقوتها؛ كل شيء في الدنيا يبدأ من جواك.. وبينتهي إليك.
نماذج الناس الناجحة دول نجحوا ازاي؟
بإنهم أدركوا نقطاط قوتهم فين واشتغلوا عليها وعرفوا يكبّروها ويُحسنوا استغلاها، وعلى النقيض الناس اللي داخلها خراب وتعب وحزن بتتخبط من هنا لهنا، ومن اختيار سيئ لأسوأ، وطبعًا كنتيجة طبيعية هتكون فيه قلة ثقة بالنفس وضعف وتردد في قرارتها، مستني ازاي شخص جواه كل ده ينجح؟
إذا فسد الملك فسدت جنوده.
ثانيًا، أساس أي شخص سوي متزن نفسيًا ونفسه مطمئنة هو البيت، شكل وطبيعة علاقة الأب والأم، يا تطلّع إنسان سوي واقف على أرض صلبه، يا إنسان غير سوي يشقى في حياته ويتخبط ويعيش يصلّح الأذى اللي صابه بدون ذنب، واللي برضه اتسببوا فيه أهله بدون قصد ولا وعي، لأن اللي صابه صابهم من قبله!
وكشخص عاش حياة أسرية صعبة قادرة أشوف بوضوح ده أثّر في شخصيتي ازّاي وكا إيه دوره في حياتي، وقادرة أشوف بوضوح الفرق بيني وبين حد عاش حياة أسرية مستقرة..
بصفة عامة، فهم النفس البشرية واستيعابها شيء مش سهل لحجم التناقضات والتعقيدات اللي فيها.. وفيه ناس بتفني عمرها بتخبط في الدنيا عشان مش فاهمة ولا عارفة نفسها، ولا عارفين عايزين إيه، ولا رايحين فين، ولا يحلوا مشاكلهم ازاي، أو يبنوا علاقات سوية مع الآخرين!
العلاقات الإنسانية مش مجرد كلمات مُنمّقة ولا موضوع إنشائي، دي عِلم، وعِلم بحره واسع قوي قوي، كل ما تغوص فيه تكتشف إنك لسه عبى الشط، وعشان كده كن ممتن جدًا جدًا لأي حد ينقل لك خبرته وبحثه وتجاربه الشخصية في الحياة..
كن ممتن لعلم ووعي بيتقدّم لك بدون مجهود من شخص دفع تمنه من وقته وعمره وأعصابه وجاي يحطهولك بين إيديك..
اعمل دورك بقى واغتنم كل فرصة تجيلك فيها إفادة، وما تكسّلش..
ما تكسلش تفرح!
أنا اكتشفت من خلال تجاربي وقراياتي إن أهم سبب يخلينا نحرص على الاهتمام بعلم العلاقات الإنسانية، إن وعي الإنسان بنفسه وتمام معرفته بيها، هو بداية الطريق الحقيقي لمعرفة الله ومراده..
