تامر حسني لـ حلا شيحة: ”قبضتي مبلغ كبير في الفيلم وكله برضاكي”
رد الفنان تامر حسني على الفنانة حلا شيحة بعد هجومها عليه واتهامه بعدم احترام رغبته لها بحذف بعض المشاهد في كليب أغنية "بحبك" التي طرحها الأخير مؤخرًا عبر "يوتيوب"، مشيرة إلى أنها بكت كثيرًا بسبب مشاهدها.
واستنكر تامر حسني هجوم حلا على الكليب رغم أنه موجود داخل الفيلم الذي طرح قبل فترة، قائلًا:"وبعدين الفيلم بقاله 3 أسابيع في السينمات والكليب موجود جوه الفيلم هو بالنسبة لك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي؟".
وتابع: "وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه!!!!! هو مش إنتي اللي صورتيه ومثلتيه بنفسك وبمنتهى الرضا ولاّ حد أجبرك".
واستكمل:"للتوضيح للجمهور الكريم أنا والمخرجة الأستاذه سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا، إنتي للأسف يا حلا ماتعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع !!! و بقيتي تقفلي تليفوناتك و تكنسلي علينا".
وأردف: "وبعدين أي فيلم بيبقى ليه خطة مسبقة في الدعاية وإنتي عارفاها كويس ووافقتي عليها ودا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل ؟؟".
اقرأ أيضا: راندا البحيري تهاجم حلا شيحة: ”دي اللي بتنصح تامر حسني”
واختتم:"أنا زعلان منك جدًا يا حلا على مفردات البوست بتاعك الغير موفقه ومستحيل هرد بطريقتك اللي فيها تجريح واتهامات باطلة ليا احترامًا لحجات كتير يمكن فايتاكي بس مش هتفوتني وعلى فكرة أنا واثق إنك عارفه اني مستاهلش منك كدا وهكتفي بالتوضيح دا وربنا يهدي الجميع و يكتبلك كل الخير اللهم آمين".
