نائب رئيس جامعة الأزهر لـ”الطلاب”: مفيش كتاب ورقي خلاص.. واللي عينه تزغلل يصلي ركعتين
وجَّه الدكتور محمد الشربيني نائب رئيس جامعة الأزهر لشئون التعليم، نداءً للطلاب بالتوقف عن المطالبة بإلغاء قرار وقف التعامل بالكتاب الورقي، الذي أقرته الجامعة بدءًا من العام الحالي.
وقال الشربيني في منشور له على صفحة المدينة الجامعية بجامعة الأزهر، السبت: "شباب نسيبنا من الصياح، وتعالوا نفهم موضوع ال cd مع بعض كده وبالراحة، علشان تعرف إيه الحكاية صح وما تاخدش الكلام من أي حد، القصة من بدايتها إن استراتيجية مصر 2030 إن مصر رقمية، وأكيد عدَّى عليكم الكلام ده، وسمعتوه بدل المرة ألف، وأكيد كمان عارفين إن فيه حاجة اسمها الحكومة الإلكترونية، وإن كل الخدمات اللي بتروح تعملها وتقف طابور ممكن تخلصها وتجيلك لحد البيت، فيه منكم سمع ده وفيه منكم جربه، طيب الكلام ده معناه إن مصر كلها بتتحول لدولة رقمية، واحنا أكيد جزء من الدولة، ولو الجامعة ما طبقتش انت نفسك اللي هتقولنا هو احنا ليه متأخرين، كل الجامعات هتطبق cd، وبينى وبينك ريحوا دماغهم وحتى مش سامعين الطلبة بتوعهم بيصيحوا زي انتم ما بتصيحوا".
وتابع: "طيب هل احنا في الأزهر هتطبق ال cd؟ الحقيقة لاء لسببين مهمين انتوا عارفينهم وهقول لهم للتذكرة إن ال cd محتاج لاب توب، طيب هيبقى على موقع الجامعة؟ هتبقى محتاج تكون باستمرار أونلاين وكتير منكم من مناطق الشبكة فيها ضعيفة أو مش موجودة، وبرضة هتبقى بتدفع تكلفة عالية في الإنترنت، طيب الحقيقة بقى احنا بنعمل إيه؟ شوف يا سيدي، احنا بنعمل موبايل أبلكيشن هتنزله على المحمول بتاعك أول مرة، وانت جهازك على النت زى ما بتنزل أي آبلكيشن من جوجل ستور، وكده كتبك هتبقى على تليفونك وتقدر تتصفحها في أي وقت سواء انت واصل لك نت أو مفيش نت".
وأوضح: "سعر الحكاية دي غالي؟ لأ، أرخص من الكتب لأن الجامعة مسعرة الكتاب ال ٢٠٠ ورقة تقريبا بـ ٢٥ جنيه، والسعر هيكون سعر رسمي، بس خلي بالك بقى إنك لو اديت صاحبك باسووردك أو بعت له أبلكيشن، نسختك هتتمسح تلقائي، وزميلك هو اللى هيدخل من جهازه، وسيبكم من حكاية الزغللة دي يا مساكين، ما انتوا قاعدين تشيِّتوا ليل نهار على مواقع التواصل الاجتماعي وأديك قاعد أهو لسّه عمال تقرأ".
وأردف نائب رئيس جامعة الأزهر: "بتمنى لكم التوفيق من قلبي وخلوا بالكم إن الدنيا كلها بقت مبنية على التكنولوجيا، وحتى لما تطلع سوق العمل هتلاقي نفسك محتاج تطور مهاراتك التكنولوجية، علشان تجاري سوق العمل، احنا زمايلكم السنة دي في الإجازة أيًا كان تخصصاتهم، بعتنا عدد كبير منهم اتدرب على مهارات سوق العمل، زي البرمجة وأمن المعلومات وتصميم المواقع، ده غير الإنجليزي والألماني علشان تساعدهم في سوق العمل، وده تم بالتعاون مع وزارة الاتصالات وجهات مختلفة لتعليم الحاجات دي، وفيه زمايل ليكم اشتغلوا بيها وجابوا منها فلوس".
وتابع: "احنا مش مهمتنا في الجامعة إننا نديك معرفة بس، لكن كمان إننا نساعدك تكون مستعد لبكره، وإنك تكون بتلبّي احتياجات سوق العمل، علشان تعرف تشتغل وتكون فرد منتج حقيقي في المجتمع، ما تقلقوش واتطمنوا، قريب بإذن الله هيبتدى التطبيق يخرج للنور ومفيش CD عندنا فى الأزهر، واللي عنيه تزغلل يقوم يتوضى ويصلي ركعتين".
كانت جامعة الأزهر قد قرَّرت إلغاء التعامل بالكتاب الورقي نهائيًا، بدءا من العام الدراسي الحاليّ، وهو ما أثار الجدل بين الطلاب وطالب بعضهم بالعدول عن القرار.
اقرأ أيضا: لنيلها بطولة العالم في الكاراتيه.. ”الأزهر” تكرم طالبة دراسات الزقازيق
