ملخص تصريحات شيرين عبد الوهاب مع عمرو أديب: «العلاقة من البداية كانت لا تصلح»

أثارت الفنانة شيرين عبد الوهاب ضجة وجدلا كبيرًا بعد مداخلتها الهاتفية الأولى بعد طلاقها مع الإعلامي عمرو أديب ببرنامج "الحكاية" المذاع عبر شاشة قناة mbc مصر الفضائية.

وقالت شيرين في مداخلتها الهاتفية: "الراجل يفضل راجل حتى لو بيكسب في الشهر 10 جنيه والست تفضل ست حتى لو بتكسب في الشهر 2 مليون جنيه.. وأنا الست دي لو جوزي شغال سواق تاكسي وسابلي 10 جنيه وقال لي ده مقدرتي يا بنت الحلال، هقول له على راسي وأبوس جزمته.. لكن ملوش دعوة أنا بكسب كام".

شيرين عبد الوهاب مع عمرو أديب

وأضافت شيرين عبد الوهاب في كلامها: "لو الراجل حس إن الست بتاعته أعلى منه في أي شيء خصوصا الماديات بيحس إنه ضعيف.. لكن الراجل يفضل راجل ودكر بقرشه اللي على قد مقدرته".

وفيما يخص ظهور شيرين دون شعر في حفلها الأخير، علقت قائلة: "الإنسان الحساس بزيادة ممكن يؤذي نفسه عشان يعاقب نفسه، وأنا كنت بعاقب نفسي.. هتقوللي بتعاقبي نفسك ليه؟ لإني غلطت في حق نفسي كتير، وغلطت في حق مكانتي وفي حق اسمي، فكان لازم أربي نفسي".

وتابعت: "أنا قلت من الأول العلاقة دي لا تصلح.. لأن صعب جدا يا أستاذ عمرو واحدة بتتجوز لثالث مرة ويبقى الفرق بينها وبين جوزها سنة.. لازم مش أقل من 5 أو 6 سنين، أنا بحب الراجل يكون في فرق بيني وبينه عشان يكون في عقل".

تصريحات شيرين عبد الوهاب

وعن طليقها قالت: "بس حسام راجل وسيد الرجالة.. الحتة الناقصة كانت ناقصة في عقلنا وفي تصرفاتنا"، لافتة إلى أنها حلقت شعرها بنفسها قبل يوم واحد من الطلاق معلقة: "عشان مكونش حلوة في عينيه فيحصل الانفصال".

ومن ضمن تصريحات شيرين عبد الوهاب الجريئة قالت: "ربنا دايما يجعلكو سند ليا، ويجعلكو الحضن اللي فعلا هيداويني، والحضن اللي فيه الأمان وفيه الحقيقة اللي مش هتروح، هو ده الحضن اللي بيديني الأمان، جمهوري.. وربنا يخليلي رئيس جمهورية بلدي، اللي أنا عارفة إن أنا بنته، عشان أنا بنت ناس كبيرة وجامدة قوي".