«سرقة وجهل».. هجوم عنيف على حسن شاكوش بعد لقائه مع عمرو أديب

تعرض مطرب المهرجانات حسن شاكوش، خلال الساعات الماضية لحملة انتقادات وهجوم شديدة بعد لقائه التلفزيوني مع الإعلامي عمرو أديب ببرنامج "الحكاية" المذاع عبر شاشة قناة mbc مصر الفضائية.

وعلق الشاعر محمد عاطف مؤلف أغنية حاجة مستخبية لـمحمد حماقي، على اتهام حسن شاكوش لصُناع الأغنية بسرقتها من أغنية تركية وقال: "ده غلط في حق الملحن مدين وفي حق الموزع أحمد إبراهيم".

وأضاف: "أحب أوضح بس إن الغنوة تمّ إعادة نشرها بعدها بفترة كبيرة من مطربة تركية، وأنهم في تركيا محترمين استأذنوا الأول وتمّ تعويضي شخصيًا كشاعر أدبيًا وماديًا".

واستكمل: "عارف يعنى إيه يتكتب لك شكر خاص باسمك في ألبوم باللغة التركية مش حرامية ولا عندهم قلة ذوق.. نجاح كلماتك وإن غنوتك عدت غنوة حماقي اللي فاهم مزيكا كويس أوي وعملت مليار مشاهدة مش عشان أنت أسطورة الجيل.. عشان الناس لقت لحن حافظاه وبتحبه عليه كلام ممنوع والممنوع مرغوب (خمور وحشيش)".

ومن جانبها الفنانة شذى هاجمت مطرب المهرجانات وكتبت عبر صفحتها: "كنت بضحك وعايزة أكسر التليفزيون من كمية الاستفزاز، وبالأخص الجزء بتاع الرد إن محمد حماقي أصلًا سارق اللحن من أغنية تركي؟".

وتابعت: "وأساسا الأغنية التركي نازلة بعد أغنيه حماقي بسنتين على الأقل!.. أغنية حماقي من 2012 جايبة 16 مليون بس؟! نقف بقى هنا.. أولًا لما نجحت أغنية وسارق لحنها، طيب كنت من باب العلم بالشيء ثقف نفسك واعرف تاريخ اللحن ده إيه، ومين اللي واخده من مين".

واستكملت: "تاني حاجة قصدك إيه بأغنية حماقي جايبة 16 مليون بس، إنك أجمد وكده من حماقي! ما هو مش معنى إن في هوجة وانحدار في الذوق، تتخيل أنك جامد أوي.. وتتكلم بتعالي كأنك مغني قصيدة الأطلال".

اقرأ أيضًا: المشاهير المتعاطفون والشامتون في استقالة هاني شاكر.. قصف جبهة من ساويرس

وشن المنتج ومنظم الحفلات وليد منصور هجومه على شاكوش قائلًا: "لما نجم كبير قوي بحجم محمد حماقي، وملحن مبدع زي مدين وموزع عظيم زي أحمد إبراهيم وشاعر كبير زي محمد عاطف اللي برة الناس عارفة قيمتهم فنيًا، وطبعًا في مصر الناس عارفة كويس دول مين بجد".

وأضاف في تعليقه: "في الآخر حد معدي يقول أغنية بتاعتي مسروقة من أغنية تركي، مش أغنيه حماقي.. ده أنا كنت حاضر بيحصل إيه علشان ميترفعش قضية ساعتها.. بجد يا رب ارحمنا من الجهل الفني وآسفين ليكم يا جامدين.. ده تركيا نفسها استأذنتكم بس والله لا يصح إلا الصحيح".