فيلم «عمهم» يتذيل الإيرادات رغم إشادة الجمهور
يتصدر فيلم عمهم محمد إمام مؤشرات البحث على جوجل مصر، وهو من الأعمال التي آثارت الجدل الفترة الماضية، خلال مشاركته ضمن أفلام عيد الأضحى 2022، حيث أن فيلم عمهم محمد إمام يتنافس أمام فيلم كيرة والجن وفيلم بحبك، ولكن فيلم عمهم منذ عرضه وهو يتذيل قائمة الإيرادات، رغم إشادة البعض بقصته.
"الطريق"، يرصد ردود أفعال الجمهور على فيلم عمهم محمد إمام والإيرادات التي وصل إليها حتى الأن فيما يلي..
رأي الجمهور في فيلم عمهم
أشاد أحد المشاهدين لفيلم عمهم، وكتب عبر حسابه على "فيسبوك": "الفيلم حلو وممتع جدًا ومعتمد بشكل كبير على الكوميديا والأكشن أكتر من القصة ومحمد إمام نجح بشكل كبير في أفلامه إنه يخلط بين الأكشن والكوميديا صح وكل واحد محطوط في دوره صح ولايق عليه الدور، بالذات محمد سلام اللي هيتنقل في حتة تانية قريب لأنه شغال على نفسه بجد وكوميدي فعلا ويخليك تضحك من قلبك وعامل دويتو هايل مع محمد إمام في الفيلم".
وتابع: "بالنسبة لبقيت الكاست بتاع الفيلم زي ما قلت كل واحد عامل دوره صح حتى لو دوره في الفيلم مش كبير، الخلاصة الفيلم حلو جدا ياخد 9.5/10 بالنسبالي وطبعًا الآراء بتختلف ممكن حد ميبقاش عجبه فاللي محتار يخش أو لأ لو عايز تخش فيلم أكشن/ كوميدي تستمتع بيه فأنصحك جدًا إنك تدخله إنما لو عايز تخش فيلم معتمد علي القصة فقط لا غير فا ممكن يعجبك وممكن لا".
وكتب آخر: " فيلم عمهم بصراحة أنا كنت داخل الفيلم ومتوقع إنه هيبقى مش حلو، بس بصراحة أنا اتفاجئت أوي، الفيلم طلع حلو جدًا، مفيهوش لحظة ملل، الكوميديا فيه كانت حلوة جداً بصراحة محستش إنها استظراف وبس، الحبكة بتاعت الفيلم تعتبر مش جديدة أوي بس اتقدمت بشكل حلو ومبتكر، أداء الشخصيات كلها كان ممتاز جداً بصراحة، التصوير كان حلو بس تقليدي، السيناريو كان حلو جدا بصراحة، مشاهد الأكشن كانت حلوة بس حسيت إنها مفيهاش ابتكار أوي، الموسيقي التصويرية كانت حلوة بس حسيتها عادية يعني مقدمتش جديد، القصة بصراحة كانت جميلة جدًا، الأحداث كانت ممتعة أوي، الإخراج بصراحة كان حاجة روعة، تقييمي للفيلم ٨.٥/١٠".
كما أشاد أحد المشاهدين أيضًا بفيلم عمهم محمد إمام، وكتب: "دخلت امبارح فيلم عمهم لمحمد إمام وسيد رجب ورياض الخولي ومحمد سلام وهدى المفتي الفيلم جميل جدًا لو أنت تدخل تفرفش نفسك وعايز تتفرج على أكشن حلو برضو فالفيلم ده ليك الكيميا بين إمام وسلام خرافية اكتر اتنين ضحكوني في الفيلم، أما آيتن عامر ولا ليها لازمة مفيش مشهد ليها ضحكت عليه ومش أنا لوحدي السينما كلها كانت عايزة مشاهدها تمشي بسرعة".
وأضاف: "الفيلم جميل ساعة ونص هتقضيهم خليط بين الاكشن الكوميدي اللي هو طبيعة أفلام إمام على قد ما الفيلم جميل بس نفسي إمام يغير يعمل حاجه درامية كده هيبقى عظمة بجد كنت متخوف إن سلام يتحذفله مشاهد بس اطمنت مفيش غير مشهد واحد اللي اتحذف والحمدلله أنه اتحذف عشان باين اوي أنه كمبيوتر مش حقيقي، في أخطاء في الفيلم محمد أمام لما بينط من أماكن عاليا متنفذتش حلو خالص مع إن السبكي بيصرف حلو في الأفلام والفيلم صارف ومكلف مش عارف مصرفوش على اللقطات دي بس ده مش هيقلل من الفيلم لأنه في حاجات جميلة، هدى المفتي كانت رائعة أفضل دور لها في العيد كيره والجن وبحبك مكنش أحسن أداء بس ده أفضلهم، سيد رجب ممثل تقيل، أحمد خالد صالح كفاية شر يا عم كنت عايز ادخل جوه الشاشة أموته كان في شخص نزل هنا على الجروب بيقول إن رياض الخولي هيموت مش هيموت يشباب بس دي كانت مراجعتي الفيلم بجد عظمة لو جالي فرصة ادخله هدخله مش هدايق تقييم 8 من 10 عشان الأخطاء دي".
اقرأ أيضًا..
«بحبك» يحتل المركز الثاني في قائمة إيرادات أفلام العيد
إيرادات فيلم عمهم
لا زال فيلم عمهم للفنان محمد إمام، يتذيل إيرادات الأفلام، حيث حقق 2،690،247 جنيه أمس الأربعاء 13 يوليو.
ويشارك في بطولة فيلم "عمهم" كلا من النجوم محمد عادل إمام، سيد رجب، محمد لطفي، ومحمود حافظ، وهدى المفتي وآيتن عامر، وهو من تأليف وسام صبري، وإخراج حسين المنباوي، تدور أحداث الفيلم في إطار من الحركة والكوميديا، ويتناول العمل قصة سلطان وهو ملاكم ومدرب يعمل مع صديقه سعيد بمركز رياضي، فتقودهما الصدفة إلى مطبعة لتزوير الأموال ويتورطا في العديد من المتاعب.
