الخطيب: ”الأهلي مش سليط اللسان”.. وهل التجاوز في حق النادي وتاريخه مخطط؟

أكد محمود الخطيب، رئيس مجلس إدارة النادي الأهلي، على احترام القلعة الحمراء لوسائل الإعلام، مشيرًا إلى أن هدفه يجب أن يكون الإصلاح وليس الهدم.

وقال الخطيب في تصريحات عبر قناة الأهلي: "الأهلي بيحترم الإعلام ودوره وفي إعلام هدفه الإصلاح مش الهدم، اتعلمنا إن الكلمة أمانة وحمل الأمانة شرف ومسئولية بس في صورة واضحة لغالبية الإعلام الرياضي في قنوات وإعلاميين انتمائهم طغى على مهنيتهم وده أمر خطر جداً".

وأوضح: "لقيت من واجبنا كعضو جمعية عمومية في اتحاد الكرة المصري أن نطلب منهم الإعلان بكل شفافية عن المخاطبات الرسمية الخاصة بالأندية الخاصة بمنح أو منع زي مثلا القيد".

وأردف: "لابد من تطوير منظومة التحكيم ومحاسبة اللي أخطأ .. تطبيق اللوائح والقانون بدون استثناءات

وأضاف: "الأهلي مادة دسمة جداً للإعلام غير أي نادي تاني، اللي عايز يقوم برنامجه يتكلم عن الأهلي بس بشكل تاني للهدم والإساءة، والملاحظ إن في تجريح فج وبشكل يومي ومحدش بيحاسب حد".

وتابع: "التجاوزات في حق النادي والتقليل من بطولاته وتاريخه في الإعلام وقت الإخفاق، هل ده مخطط ؟، نرى بوضوح إن في تربص واستهداف، فين المجلس الأعلى لتنظيم الإعلام؟ اشتكينا قبل كده وناس بتجرح كل يوم وأحنا ردينا مرة عملت تحقيق مع الاتنين، بس محدش بيعمل حاجة".

وواصل: "لازم المجلس الأعلى للإعلام يكون له دور أقوى من كده، ميجيش على رد الفعل ويسيب الفعل".

وأكد: "النادي الأهلي مش سليط اللسان ولا سباب ولا بذئ، الأهلي أكبر من كده بكتير، الأهلي صوته عال في الحق".

وأكمل: "لو في حد بيتحالف ضد الأهلي، جمهور الأهلي هو هيكون الداعم الأول والحصن والأمان والشريك الأساسي لانتصارات الأهلي، وهتكونوا انتوا الظهر والسند وقت الاخفاقات اللي هي قليلة، الوقت ده محتاج تكاتف كل عناصر نادينا وعلينا احنا كمان نشتغل ونشتغل ونشتغل".

واختتم الخطيب تصريحاته: "الأهلي مش للبيع، الأهلي لجماهيره وأعضائه ومش ممكن يكون للبيع".