الفن

بعد فتحه لباب النقاش .. تامر حسني لجمهوره: ”متبقاش أكبر عدو لنفسك”

الإثنين، 15 أغسطس 2022 04:48 مـ بتوقيت القاهرة

تعود النجم تامر حسني على تقديم المساعدة لجمهوره إما عن طريق تقديم إحدى المواهب التي يكتشفها، أو عن طريق الكلام الإيجابي والتحفيز.

وبعد أن فتح النجم تامر حسني باب المناقشة مع جمهوره في بوست على صفحته، وقام بالرد على أغلب تعليقات جمهوره على هذا البوست، إكتشف تامر أكثر الأشياء التي تسبب إحباط لجمهوره، وقرر الرد عليها في بوست منفصل.

حيث كتب تامر عبر صفحته على "انستجرام"، قائلًا: "من التعليقات على آخر بوست ليا .. تفهمت أكثر الأشياء المحبطة لكم، وهما: اليأس من النجاح وإحباط المقربين .. هطلب منكم طلب تذكروا معاناتي بدون أب ومال وكنت أعمل كعامل بنزينه وسوبر ماركت وفاعل (يعني اللي بيبنوا العمارات) لأعود لوالدتي ب خمسة جنيه بالإضافة لمرتب النادي أثناء لعبي للكورة كان مرتبي 22 جنيه في الشهر منهم بقا للماء والكهرباء وعمليات أخويا بسبب مرضه لفترة كبيرة".

وأكمل تامر: "كنت افعل المستحيل من أجل أمي وأخويا وللوصول لهدفي، كان بداخلي سعى للكورة والغناء وأقول هذا لأنه يجب أن أنصح بالخطة البديله عشان لو الحلم مجاش يكون في غيره، أنا كان نفسي أبقى لاعب كورة والأندية كلها مشوني رغم تفوقي، كنت اتساءل لماذا تُغلق كل الأبواب ولكنها كانت تُغلق لتوجيهي لمسار آخر وعندما آمنت بذلك فهمت إن ربنا كان شايلي الأحسن ليا بس ساعتها مكنتش فاهم".

وأضاف: "من يسأل نفسه حاليًا هل أستمر في حلمي أو أبحث عن حلم آخر، أقول له أطلب من ربنا المساعدة سيرسل لك علامات بس الشاطر اللي يفهمها، علامات هتأكدلك تكمل أو لا بس إجتهد وإتعب عشان المجهود ده ليه كرم مستخبي في مجالك التاني ف اوعى تقول تعبت ع الفاضي".

وأتبع:"أما المحبطين سيظلوا متواجدين وأنت من تسمح لنفسك بالإستماع لهم، إوقف ذلك فورًا ولا تكون السبب في إيذاء نفسك، لا تذهب إلا لكل جميل إيجابي ستجد الخير يأتي ولا تفعل العكس لأنه سيأتي أيضًا، إنت السبب دايما قول يارب وإفهم إن الراحة المطلقة في الجنة بس وإحنا على الأرض وربنا قال إنه خلقنا في كبد يعني شقاء عشان يكون عندنا تحدي نكسبه عشان كتير قبلينا كانت ظروفهم أصعب ووصلوا يبقى الموضوع فينا، متبقاش أكبر عدو لنفسك، خد قرار صارم فورًا في التغيير والنجاح، والله هتوصل .. متسمعش غير لقلبك وسلمه للي خلقه وتوكل على الله".

وكان النجم تامر حسني قد نشر من قبل بوست على صفحته الرسمية على "انستجرام" فاتحًا باب المناقشة مع جمهوره، حيث قال: "حبايب قلبي إن شاء الله كل كام يوم بالليل كده نتناقش في موضوع من خلال مشواري وتجربتي في الحياة، جايز تستفيدوا منه ويكون في كتير منكوا هيكون كلامي إشارة تشجعهم كانوا منتظرينها".

واختتم كلامه: "أنا عايز أفتح باب نقاش حقيقي يخليكوا تاخدوا قرارات مهمة في حياتكم وتتحمسوا لخطوات إيجابية إتكلموا وقولوا اللي جواكم هنا وأى أسئلة جواكم لما تتقال هنا هتبقى أول خطوة للصح عشان هتتولد طاقة كبيرة للخير شاهد عليها ربنا فهتكون خير أوي لينا إن شاء الله .. في بعض الآراء هرد عليها في استورى يارب تشوفوا الردود عشان هتخصكوا برضو".