إيهاب البدوي يكتب: «تربة هواها ترد الروح»
"كنت دائم الزيارة لمسجد السلطان حسن في القلعة، ولم يشدني مسجد الرفاعي المجاور ليه على الرغم من أن الرفاعي تقريبا واخد طراز بناء يشبه طراز بناء مسجد السلطان حسن، لكن فيه فرق كبير بينهم وهو نفس الفرق بين تمثال فرعوني أثري وبين قطعة تقليد معمولة في الصين".
"مسجد السلطان حسن مبني من ألف سنة تقريبا، بينما مسجد الرفاعي قامت ببنائه خوشيار هانم والدة الخديوي إسماعيل من ٢٠٠ سنة"
"مسجد الرفاعي ده اللي صورة النجفة بتاعته موجودة على العشرة جنيهات القديمة والميزة الوحيدة في مسجد الرفاعي أن فيه مقبرة العائلة المالكة، من أول الخديوي إسماعيل حتي الملك فاروق".
"لما دخلت المسجد بدأت بقبر الملك فاروق، حاجة في منتهي الفخامة، رخام أبيض مرمري في قاعة أحسن من أتخن أوضة جلوس حضرتك شفتها في حياتك، عند أغنى واحد في بلدكم".
" وشوفت قبر الخديوي والملك فؤاد حاجة آخر عظمة وأبهة، لكن لما دخلت المكان اللي فيه قبر شاه إيران عرفت أن ملوك مصر تجوز عليهم الصدقة، القبر من المرمر الأخضر والشبابيك مش عارف مدهونة بالنحاس ولا مية الدهب، والسجاد العجمي مفروش على الأرض، ورائحة دهن العود ضاربة في المكان، وطبعا المكان مكيف
لما تقعد هناك يجيلك شوية هواء يردوا الروح زي ما بيقولوا".
" أنا جاي من ثقافة مقابر الفلاحين اللي الناس تخاف تعدي من قدامها ليل ولا نهار عشان كدة كنت معجب جدا بمقابر الناس الأكابر، فاضلها تليفزيون وشيشة وباكو معسل وممكن أروح اقعد هناك".
"بقيت كلّما ابقي مخنوق وعايز أغير جو اروح أقعد شوية في مقبرة شاه ايران اللي فعلا ترد الروح وكأني سافرت جمصة خميس وجمعة وغيرت جو"
الله يرحم الأكابر.
