الفن

ريهام عبد الغفور: «سنة 2022 عاملة زي الغرفة 207»

الإثنين، 2 يناير 2023 04:24 مـ بتوقيت القاهرة

وصفت الفنانة ريهام عبد الغفور سنة 2022 بأنها مثل مسلسلها "الغرفة 207"، كما أعربت عن سعادتها بنجاحاتها الأخيرة في أكثر من عمل.

قالت ريهام في مداخلة هاتفية ببرنامج "خلاص صحينا" عبر إذاعة ميجا fm: "ربنا كرمني كتير قوي في سنة 2022، وكل الأعمال دي متصورتش ورا بعض كان بينهم فترات، ومكنتش متخيلة إن كلهم يتعرضوا ورا بعض كده ويحققوا النجاح ده".

وتابعت: "في الأول كنت قلقانة وخايفة إن الناس تزهق مني لما تشوفني كتير ورا بعض، بس لما المسلسلات اتعرضت ورا بعض وكل مسلسل بدور مختلف، عملوا ردود أفعال جماهيرية وإيجابية بشكل مكنتش متوقعاه".

ريهام: لو كان النجاح جالي وأنا صغيرة مكنتش حسيت بقيمته

وأضافت: "طول الوقت ببقى حريصة أشتغل على نفسي وأحاول أتغير وأقدم حاجات مختلفة للجمهور، وعارفة إن دوام الحال من المحال، لو النجاح ده كنت حققته وأنا صغيرة كنت هتعود عليه ومحسش بقيمته زي دلوقتي، لما كبرت فهمت إن يوم واحد يقدر يغير كل حاجة".

ريهام عبد الغفور: 2022 زي الغرفة 207

قالت ريهام عن سنة 2022: "عاملة زي الغرفة 207 محدش خرج منها زي ما دخلها، وأنا خرجت منها متعلمة إن مفيش حاجة بتدوم، ومفيش أي ضمانات لأي حاجة، ودايمًا بدعي ربنا إنه يغير حالنا للأحسن".

مكاسب 2022 بالنسبة لريهام عبد الغفور

وأكدت ريهام: "خرجت من 2022 بشخصيات كتير جدًا، أهمهم المخرجين اللي اشتغلت معاهم واللي استفدت من كل واحد فيهم، لأن كل واحد كان ليه طريقته ومدرسته الخاصة، وكمان كل زمايلي اللي اتبسطت بالشغل معاهم".

آخر أعمال ريهام عبد الغفور

حققت الفنانة ريهام عبد الغفور العديد من النجاحات خلال الفترة الماضية بعد عرض أكثر من عمل لها، أولهم مسلسل "منعطف خطر" مع باسل الخياط، باسم سمرة، ومن إخراج السدير مسعود.

ومسلسل "وش وضهر" مع إياد نصار ومن إخراج مريم أبو عوف، وأيضًا مسلسل "الغرفة 207" مع الفنان محمد فراج، ومن إخراج محمد بكير.