طارق لطفي في حواره لـ«الطريق»: غيرت جلدي بمذكرات زوج.. والطلاق من أسوأ الأمور
مشوار طارق لطفي مليء بالنجاحات، والأدوار التي حملت رسالة هادفة، كما أن أغلب أعماله الأخيرة كانت تراجيدية، إلا أنه قرر أن يغير جلده هذا العام من خلال مسلسل مذكرات زوج الاجتماعي الكوميدي، إذ تألق في تجسيد شخصية الأب المتهور الذي يعاني العديد من الأزمات، واستطاع من خلال شخصية رؤوف أن يُلقي الضوء على عدة مشاكل قد يقع بها بعض الأزواج والأباء، كما تحدث عن خطته السينمائية المقبلة.
موقع وجريدة "الطريق"، أجرت حوارًا مع الفنان طارق لطفي للحديث عن مسلسل مذكرات زوج، وعن خطته السينمائية المقبلة، وإليكم نص الحوار.
ما الذي جذبك لتقديم مسلسل مذكرات زوج؟
لاقيت إن المسلسل عمل إنساني وواقعي وممكن يتقدم في أي زمن، لأن علاقة الزواج بتتعرض لعدد من الأزمات زي الضغوطات اللي بيتعرضلها.
إذن.. هل من الممكن إعادة هذه الشخصية مجددًا؟
ايوة ممكن أقدمها تاني لكن بعد عشر سنين.
مسلسل مذكرات زوج كوميدي والجمهور ارتبط بك لأعوام بالأعمالل التراجيدية.. كيف حدث هذا؟
أنا شايف إن الفنان لازم يغيير من أدواره لأن التغيير مهم جدا لأي ممثل، خصوصًا إذا كانت أدواره اللي عملها قبل كده حققت نجاح.
هل توقعت نجاح المسلسل؟
وقت التصوير كنت قلقان جدًا لدرجة إن كل ما اتكلم أن والمؤلف محمد سليمان كان كلامنا بينتهي بخناقة، لكن بعد عرض أول حلقة وشوفت كل النجاح ده، اختفى كل التوتر.
البعض رأى أن المسلسل كان يتحمل مده إلى 30 حلقة وليس 15 فقط..
اعتقد إن خلال 15 المسلسل حقق غرضه، وده اللي الشركة المنتجة اروما ستوديوز والمنتج تامر مرتضى شافوا إنه انسب للعمل.
بعد نجاح مسلسل مذكرات زوج.. هل يمكن تقديم جزء ثانِ منه؟
ده حقيقي بعد نجاح مسلسل مذكرات زوج اتحمسنا جدا لتقديم جزء ثاني من العمل وأنا مستني تصويره بفارغ الصبر.
وما الجديد الذي سيقدمه؟
أكيد هنقدم عمل برؤية جديدة تخلي الجمهور مندهش من اهتلافها زي ما بعتمد في كل أعمالي من وقت بدايتي.
وماذا عن ردود الأفعال..
العمل قدمناه كلنا بحب وعشان كده النتيجة كانت مُرضية، وبعد عرض المسلسل شوفت مقالات من أطباء نفسيين عن ازاي محدش يقع في فخ مسلسل مذكرات زوج سواء كانت الزوجة أو الزوج، لأننا قدمنا ضغوط حياته كإنسان.
كيف رأيت نهاية العمل؟
رؤوف في نهاية المسلسل اكتشف ذاته، وعشان كده رجع لزوجته، والدين قال إن الزواج سكن، والطلاق هو من أسوأ الأمور اللي ممكن تحصل للأودلاد والزوجين كمان.
هل يوجد تشابه بينك وبين شخصية رؤوف؟
لأ، انا مش متهور زيه، لأني بمشي حياتي بطريقة مختلفة، ولو لقدر الله واجهتني مشاكل بواجهها وبتغلب عليها، وده اللي اتربيت عليه من أهلي، فأنا اتعلمت من والدي ووالدتي إن كلمة شكرًا كلمة مفيدة جدًا وبتخلي اللي قدامي يحس بالامتنان.
ما رأيك في تقديم أعمل خارج موسم مسلسلات رمضان؟
المنافسة في موسم رمضان وسط العمالقة من النجوم ليه طعم خاص، خصوصًا لو حققت نجاح وسط نجاحهم، لكن ده لا يعني إني ضد الأعمال اللي بتتعرض برة الموسم، لأنها بتكون مختلفة وناجحة.
أين انت من السينما؟
بعتبر إن السينما عبارة عن مغامرة ومفتقدها جدًا، لكن لازم لما أخوض تجربة أكون حاسبلها كويس لأن معيار النجاح ليها الوحيد هو الإيرادات وده عكس اللي بيحصل في الدراما التلفزيونية اللي بتعكس النجاح من خلال تفاعل الجمهور وزيادة الإعلانات على العمل، وبعد فيلم 122 كان عندي فيلم حفلة 9 لكن المشروع وقف بسبب مشاكل الإنتاجية، وفي فيلم جديد لكن مش هتكلم عنه حاليًا إلا بعد ما أبدأ التصوير.
هل ستشارك في الموسم الثانِ من صعيدي في الجامعة الأمريكية؟
هشارك لكن مش كبطل، مشاركتي هتكون شرفية، لأن مفيش منتج مصري هيقدر يجمع كل أبطال الجزء الأول في الجزء التاني، وهنا أقصد بسبب أجور الفنانين.
