مصطفى كامل: «اللي هيفكر يعمل مصالح في النقابة هخرجه بميراث سيئ لعائلته»
وجه الفنان مصطفى كامل نقيب الموسيقيين رسالة شديدة اللهجة للمرشحين على منصب عضو مجلس إدارة نقابة المهن الموسيقية، مؤكدًا أنه لن يسمح بتواجد أى فساد داخل النقابة، وذلك على هامش المؤتمر الصحفي الذي أقيم منذ قليل للإعلان عن تفاصيل انتخابات الموسيقيين.
وقال الفنان مصطفى كامل في المؤتمر الصحفي: "أنا استحملت كثير في فترة الـ 8 شهور اللى فاتوا عبرنا جسرنا وكنت بحتوى كل حاجة، ومن تحدث عن سلبيات بعتذر له لو كان في قصور في فترتي أو كان فيه غفلة مني لإني في الآخر عبد، وأنا لم أدخر جهد أى دقيقة في حياتي أمام الله على مدى الفترة اللي دخلت فيها النقابة من يوم 11 أكتوبر لحد دلوقتي ويقعدلي في صحتي وأولادي".
اقرأ أيضًا: «رهان صعب».. طارق الشناوي يكشف عن رأيه في تقديم جزء ثاني من مسلسل جعفر العمدة (خاص)
مصطفى كامل: اللي ناوي على فساد يتنازل عن مكانة للشرفاء
وأضاف مصطفى كامل: "عندنا فترة تنازلات الأسبوع الجاى أى شخص في نيته يعمل حاجة كده ولا كده عندك فترة التنازلات من يوم الأحد إلى الثلاثاء، وبقوله قصر نفسك معايا واكتفي بتنازلك عن المكان للشرفاء، لإنك ساعتها هتخرج من معايا بشكل مش حلو".
وتابع كامل: "اللي هيفكر إنه داخل يعمل أي مصالح في النقابة هيخرج منها بميراث سيئ لعيلته وأنا بقولها قدام الكل، مش بس هنقوله مع السلامة ونلم الدنيا، أنا عرفت إن كان فيه قضايا فساد بتتلم في الخفاء ونجيبه ونقطع الإيصال ومعلش مش هيحصل كده ومش هنطلع عشان الجرائد".
مصطفى كامل: مفيش فاسد هيكمل معايا
وأكد: "لكن أنا ورب الكعبة لأعلن، أولًا هعلن من خلال صفحتي وعلى موقع النقابة لما يتفعل وقدام الإعلام، واللي ناوي على أى حاجة كده هيخرج لابن ابنه يفضل يحكي الحكاية، اللي هيقعد معايا فاسد لمدة شهر مش هيكمل شهر ويوم، ومفيش فاسد هيكمل معايا بعد ما يتجاب بفساده اللي مش هيحترم المقعد ملوش بينا مكان".
اقرأ أيضًا: بعد فوزه بالتزكية.. مصطفى كامل باكيًا: «عدم ترشح أحد شرف ليا»
