عبد الواحد السيد يوجه رسائل نارية لـ”الحضري”: رحلت بسبب الفلوس.. ونادر السيد حذرني منك (فيديو)

ما تزال أصداء تصريحات عصام الحضري حارس منتخب مصر السابق، عن فترة تواجده في نادي الزمالك مستمرة، فبعد هجوم رئيس الأبيض على الحارس المخضرم، خرج عبد الواحد السيد حارس مرمى الزمالك السابق وزميل الحضري ليرد عليه، موجهًا عدة رسائل نارية.

وكان عصام الحضري قد صرح خلال حوار تلفزيوني منذ أيام، عن فترة لعبه لنادي الزمالك، متمنيًا محوها من تاريخه، بسبب تراجع النادي في ذلك الوقت.

ورد عبد الواحد على تصريحات زميله السابق، حيث قال: "مينفعش أن عصام الحضري يقول كده، مهما كان التجربة سيئة، وجودك في الزمالك شرف ليك".

وكشف: "الفلوس والماديات هي السبب في رحيل الحضري عن الزمالك، فالنادي مر بأزمة مالية في الوقت ده، وهو مصبرش لما مقبضش مرتب شهر أو شهرين، ودا الفارق بين ابن النادي وباقي اللاعبين".

وتابع: "لو مبيعرفش يعبر عن اللي يقصده، يبقى الأفضل ميتكلمش، أنك تلبس تيشيرت الزمالك ده شرف، وأنت سعيت كتير علشان تلعب في الزمالك".

وأكمل عبد الواحد: "الحضري كان محظوظ بظهوره في جيل قوي في منتخب مصر والأهلي اللي كان يشتري وقتها أي لاعب كويس في الدوري المصري".

وواصل: "أنا كنت حارس مصر الأساسي قبل 2006، لكني تعرضت لإصابة قوية أبعدتني 5 شهور، بعدها شاركت في مباراة جنوب إفريقيا الودية الأخيرة قبل البطولة ومكنتش موفق، ولولا الإصابة لكنت أنا حارس مصر في أمم إفريقيا 2006".

وأكمل: " الحضري لو كان استمر في الزمالك، أنا بردو اللي كنت هبقى الحارس الأساسي، مفيش حارس يقدر يلعب عليا في الزمالك".

وكشف: "حسام حسن قالي أنه جاب الحضري الزمالك، علشان لو أنا لعبت عليه أساسي في الفريق هكون الحارس الأول للمنتخب، وطبعا رحبت بالمنافسة".

وواصل: "الحضري سب عماد المندوه علشان نظام المداورة معجبهوش، رغم أنا اللي المفروض أتضايق، لأني كنت الحارس الأساسي قبل قدومه، وقدمت موسم مميز قبلها".

اقرأ أيضًأ:مرتضى منصور يرد على الحضري: ”الزمالك طردك.. وإنت بكيت علشان تلبس التيشيرت الأبيض” (فيديو)

وأوضح: "لعبت مع عبد المنصف 13 سنة، ومحصلش أي خلاف شخصي بينا، لكن الحضري بيكشر ومايسلمش عليك، فهو مش بيعرف يفصل بين جوة وبرة الملعب".

واختتم عبد الواحد السيد تصريحاته: "نادر السيد قال لي في مرة إن الحضري يعامل الشخص كويس جدًا حتى تحدث منافسة بينكما".